काठमाडौं (हाम्रो खेलकुद)– बंगलादेश यू२३ ले नेपालमा जारी १३ औं दक्षिण एसियाली खेलकुद (साग) पुरुष टि ट्वान्टी क्रिकेटमा स्वर्ण जितेको छ । सोमबार फाइनलमा श्रीलंका यू२३ लाई ७ विकेटले हराउँदै बंगलादेशले स्वर्ण जितेको हो । महिला साग टि ट्वान्टीमा पनि श्रीलंकालाई हराउँदै बंगलादेशले स्वर्ण जितेको थियो ।

१ सय २३ रनको विजयी लक्ष्य पछ्याएको बंगलादेशले १८.१ ओभरमा ३ विकेट गुमाउँदै पुरा गर्यो । बंगलदेशको जितमा ओपनर सैफ हसनले ३० बलमा ३ चौका र २ छक्का सहित ३३ रनको योगदान दिए । सौम्य सरकार २७, कप्तान हुसेन सान्टो ३५ र याशिर अलि १९ चौधरीले रन जोडे । श्रीलंकाका कामिन्दु मेन्डिस र सचिन्दु कोलोम्बेगे १–१ विकेट लिए ।

त्यस अघि टियु क्रिकेट मैदानमा टस हारेर ब्याटिङ थालेकोे श्रीलंकाले निर्धारित २० ओभरमा अल आउट हुँदै १ सय २२ रनमा समेटिएको थियो । श्रीलंकाका ओपनर पाथुम निसानका २२, निशान मदुशका १६, चारिथ असालंका १२ र शम्मु अशानले २५ रनको योगदान दिए । अन्य कुनै पनि ब्याट्सम्यानले राम्रो प्रर्दशन गर्न सकेनन् । बंगलादेशका हसन महमुद ३, तनवीर इस्लाम २, सुमन खान र मेहदी हसनले १–१ विकेट लिए ।

सन् २०१० को सागमा पनि बंगलादेशले श्रीलंकालाई ६ विकेटले हराउँदै स्वर्ण जितेको थियो । नेपाल श्रीलंकासँग ६ विकेट र बंगलादेशसँग ४४ रनले पराजित भएको थियो । नेपालले माल्दिभ्सलाई ५ विकेटले हराउँदै कास्य जितेको थियो ।