काठमाडौं (हाम्रो खेलकुद) – १३ औं दक्षिण एसियाली खेलकुद (साग) पुरुष टि ट्वान्टी क्रिकेट प्रतियोगिता अन्तर्गत कास्य पदकको लागि भएको प्रतिस्पर्धामा माल्दिभ्सले नेपाललाई ९५ रनको सामान्य लक्ष्य दिएको छ ।

टियु क्रिकेट मैदानमा टस हारेर ब्याटिङ थालेको माल्दिभ्सले २० ओभरमा ९ विकेट गुमाउँदै ९४ रन बनायो । ओपनर मोहम्मद रिजवान र अहमिद हसनले ४.३ ओभरमा २२ रनको साझेदारी गरेका थिए । सुसन भारीले रिजवानलाई १७ रनमा बोल्ड आउट गर्दै नेपाललाई पहिलो सफलता दिलाए । रिजवानले १८ बलमा २ चौका र १ छक्का प्रहार गरे ।

छैटौं ओभरको तेस्रो बलमा ललित नारायण राजवंशीले अहमिदलाई ६ रनमा बोल्ड आउट गरे । ललितलेनै आठौं ओभरको पहिलो बलमा फजान फरहतलाई २ रनमा एलबी डब्लू आउट गरे । दुई बलपछि इब्राहिम हसन शून्यमा रन आउट भए । नवौं ओभरको पहिलो बलमा विकेटकीपर मोहम्मद आजमलाई पारस खड्काले शून्यमा रन आउट गरे । लगतै अर्को बलमा पारसले उमर एडमलाई ११ रनमा बोल्ड आउट गरेपछि माल्दिभ्सबाट ठूलो इनिङको संभावना सकिएको थियो ।

कप्तान मोहम्मद महफूज ठूलो सर्ट खेल्ने धुनमा ज्ञानेन्द्रबाट १६ रनमा क्याच आउट भए । उनले २३ बलमा २ चौका प्रहार गरे । अन्तिम ओेभरको तेस्रो बलमा अमिल माउरुफ १३ रनमा रन आउट भए । उनले २४ बलमा १ चौका प्रहार गरे । लिम सफिग ११ बलमा २ चौका र १ छक्का सहित १९ रनमा नट आउट रहे ।

स्पिनर ललित नारायण राजवंशीले ४ ओभरमा ६ रन खर्चेर ३ विकेट लिए । पारस खड्काले ४ ओभरमा १ मेडन सहित १८ रन खर्चेर १ विकेट लिए । सुसन भारीले ४ ओभरमा २४ रन खर्चेर २ विकेट लिए ।