पोखरा (हाम्रो खेलकुद) – नेपाली राष्ट्रिय महिला क्रिकेट टोलीकी बलर अञ्जली चन्द १३ औं दक्षिण एसियाली खेलकुद (साग) मा सर्वोत्कृष्ट खेलाडी घोषित भएकी छिन् ।

दुई टेष्ट राष्ट्र बंगलादेश र श्रीलंकाका खेलाडीलाई पछि पार्दै अञ्जली प्रतियोगिताको सर्वोउत्कृष्ट खेलाडी चुनिएकी हुन् । आइतबार सम्पन्न महिला टि ट्वान्टी सागमा स्वर्ण बंगलादेशले जित्यो । फाइनलमा श्रीलंकालाई २ रनले हराउँदै बंगलादेशले स्वर्ण चुम्न सफल भएको हो । नेपालले माल्दिभ्सलाई १० विकेटले हराउँदै कास्य पदक जितेको थियो ।

लिग चरणमा पनि नेपालले माल्दिभ्सलाई १० विकेटलेनै हराएको थियो । जुन खेलमा अञ्जलीले माल्दिभ्सविरुद्ध २.१ ओभरमा कुनै रन नदिई ६ विकेट लिदै विश्क कीर्तिमान कायम गरेकी थिइन् । जुन महिला र पुरुष टि२० आई दुबैको सर्वोत्कृष्ट प्रर्दशन हो ।

अञ्जलीले सागमा ४ खेलमा ५ मेडन सहित ३० रन खर्चेर ११ विकेट लिएकी थिइन् । सागमा सर्वाधिक विकेट लिने खेलाडी पनि अञ्जलीनै रहिन् । सर्वाधिक विकेट लिने खेलाडीको सुचिमा दोस्रो स्थानमा रहेकी बंगलादेशकी नाहिदा अख्तरले ४ खेलमा ८ विकेट लिइन् ।

बंगलादेशसँग १० विकेट र श्रीलंकासँग ४१ रनले पराजित भएपछि नेपालको स्वर्णको संभावना सकिएको थियो । कास्य पदकको लागि भएको प्रतिस्पर्धामा माल्दिभ्सलाई १० विकेटले हराएको थियो ।