पोखरा (हाम्रो खेलकुद) – नेपाली राष्ट्रिय महिला क्रिकेट टोलीकी कप्तान रुबिना क्षेत्री (बेलबासे) ले १३ औं दक्षिण एसियाली खेलकुद (साग) महिला टि ट्वान्टी क्रिकेट प्रतियोगितामा आफुहरुमा खेलको अनुभवको कमी देखिएको बताएकी छिन् । शनिवार नेपालले माल्दिभ्सलाई १० विकेटले हराउँदै कास्य जितेपछि हाम्रो खलकुदसँग कुरा गर्दै रुबिनाले यस्तो बताएकी हुन् ।

‘मैले पहिला भनेको पनि थिए । राम्रो खेल्नको लागि अनुभव चाहिन्छ । दबाबमा खेल्न सक्नुपर्छ । सागमा हामीले बलिङ र फिल्डिङ राम्रो गयौं । तर ब्याटिङ चलेन । ब्याटिङ किन चलेन भने हामीसँग खेलको अनुभवको कमी छ । राम्रो ब्याटिङको लागि धेरै खेलको अनुभव चाहिन्छ’, उनले भनिन् ।

‘हामीलाई पहिला टेष्ट राष्ट्र धेरै राम्रो होला जस्तो लाग्थ्यो । खेलिसकेपछि थाहा भयो । हामी र उनीहरु एकै हो । खासै फरक छैन । फरक यति मात्र हो हामीहरुमा खेलको अनुभवको कमी छ । तालमेल बनाउन सिक्नुपर्छ’, उनले भनिन् ।

रुबिनाले पहिलो पटक घरेलु मैदानमा अन्तर्राष्ट्रिय प्रतियोगिता खेलेको नेपालले सागबाट धेरै कुरा सिकेको बताइन् । ‘हामीले ब्याटिङमा राम्रो तालमेल गर्दै साझेदारी गर्न सक्नुपथ्यो । एउटाले इनिङ समाल्दा अर्काले अर्कोतर्फबाट रन बनाएको भए राम्रो हुन्थ्यो होला । त्यसो हुन सकेन । सागमा हाम्रो प्रर्दशन राम्रो र नराम्रो दुवै रह्यो, उनले भनिन्, ‘कुनै पनि खेल जित्न बलियो मनोबल हुनुपर्छ, हामीले जुन कुरा फोकस गरेनौ, आगमी दिनमा त्यहि कुरालाई जोड दिदै लैजानुपर्छ ।’

नेपालले पहिलो खेलमा माल्दिभ्सलाई १० विकेटले हराएको थियो । यसै खेलमा स्पिनर अञ्जली चन्दले २.१ ओभरमा कुनै रन नदिइ ६ विकेट लिदै विश्व कीर्तिमान रचेकी थिइन् । दोस्रो खेलमा नेपाल बंगलादेशसँग १० विकेटले पराजित भएको थियो । श्रीलंकासँग ४१ रनले पराजित भएपछि नेपालको फाइनलको यात्रा समाप्त भएको थियो । सम्रगमा महिला टोलीको सागमा बलिङमा राम्रो प्रर्दशन गरेपनि ब्याटिङमा आशा अनुसारको प्रर्दशन गर्न सकेनन् ।