काठमाडौं (हाम्रो खेलकुद) – कप्तान नज्मुल हसन सान्टो र अफिफ हुसैनले अर्ध शतक प्रहार गरेपछि १३ औं दक्षिण एसियाली खेलकुद (साग) पुरुष टि ट्वान्टी क्रिकेटमा बंगालदेश यू२३ ले नेपाललाई १ सय ५६ रनको लक्ष्य दिएको छ ।

शनिवार विहान टियु क्रिकेट मैदानमा टस हारेर ब्याटिङ थालेको बंगलादेशले निर्धारित २० ओभरमा ६ विकेट गुमाउँदै १ सय ५५ रन बनायो । बंगलादेशका कप्तान नज्मुल हसन सान्टो ६० बलमा समान ४ चौका र छक्का सहित ७५ रनमा अविजित रहे । त्यस्तै अफिफ हुसैन २८ बलमा ६ चौका र १ छक्का सहित ५२ रनमा बोल्ड आउट भए ।

अफिफलाई अन्तिम ओभरको चौथो बलमा दीपेन्द्र सिंह ऐरीले बोल्ड आउट गरे । लगत्तै पाँचौ बलमा दीपेन्द्रले महीदुल इस्लाम अनोकनलाई पारस खड्काबाट शून्यमा क्याच आउट गराए । धरमराएको बंगलादेशको इनिङलाई पाँचौ विकेटका लागि अफिफ र नज्मुलले ९४ रनको साझेदारी गर्दै बलियो योगफल सम्म पुर्याए ।

दोस्रो ओभरको तेस्रो बलमा पारस खड्काले ओपनर मोहम्मद नइम शेखलाई ६ रनमा बोल्ड आउट गरेका थिए । अर्का ओपनर सौम्य सरकारलाई चौथो ओभरको तेस्रो बलमा पारसले करण केसीबाट ६ रनमा क्याच आउट गराए । पारसले लगतै पाँचौ बलमा सैफ हसनलाई शून्यमा बोल्ड गरे ।

खराब सुरुवात गरेको बंगलादेशलाई नज्मुल हसन सान्टो र यासिर अलीले चौथो विकेटको लागि ४३ रनको रनको साझेदारी गर्दै इनिङ उकासेका थिए । ११ औं ओभरको दोस्रो बलमा अभिनास बोहोराले याशिरलाई ज्ञानेन्द्र मल्लबाट १४ रनमा क्याच गराउँदै साझेदारी तोडेका थिए ।

नेपालका पारस खड्काले ४ ओभरमा १५ रन खर्चेर ३ विकेट लिए । दीपेन्द्र सिंह ऐरीले ४ ओभरमा ३१ रन खर्चेर २ विकेट लिए । अभिनास बोहोराले ३ ओभरमा ३० रन खर्चेर १ विकेट लिए ।