काठमाडौं(हाम्रो खेलकुद) – अलराउन्डर करण केसीले विश्फोटक ब्याटिङसँगै १३ औं दक्षिण एसियाली खेलकुद (साग) पुरुष टि ट्वान्टी क्रिकेट प्रतियोगितामा नेपालले माल्दिभ्सलाई १ सय ६४ रनको लक्ष्य दिएको छ ।

टियु क्रिकेट मैदानमा टस जितेर ब्याटिङ थालेको नेपालले निर्धारित २० ओभरमा ७ विकेट गुमाउँदै १ सय ६३ रन बनायो । नेपाललाई बलियो योगफल सम्म पुर्याउन करण केसीले १६ बलमा ४ छक्का र २ चौका सहित अविजित ४० रनको योगदान दिए ।

करणले अन्तिम ओभरमा इब्राहिम हसनलाई २ चौका र २ छक्का प्रहार गर्दै २४ रन बटुलेपछि नेपाल बलियो योगफलमा पुगेको हो । ओपनर पारस खड्कालाई दोस्रो ओभरको अन्तिम बलमा लिम शफिगले मोहम्मद नवाजबाट ११ रनमा क्याच आउट गराए ।

छटौं ओभरको दोस्रो बलमा आमिल माउरुफले आरिफ शेखलाई ११ बलमा १ चौका र १ छक्का सहित १७ रनमा खेलि रहेको अवस्थामा क्याच आउट गराए । यसै ओभरको अन्तिम बलमा कप्तान ज्ञानेन्द्र मल्ल १९ रनमा एलबी डब्लू आउट भए । मल्लले १६ बलमा २ चौका र १ छक्का प्रहार गरे ।

दशौं ओभरको चौथो बलमा रोहित कुमार पौडेल १० रनमा क्याच आउट भएका थिए । रोहितलाई कप्तान मोहम्मद महफूजले विकेटकीपर मोहम्मद आजमबाट क्याच गराए । ११ औं ओभरको तेस्रो बलमा उमर एडमले मोहम्मद रिजवानबाट क्याच गराउदै पवनलाई शून्यमा पेभिलिएन फर्काए ।

विनोद भण्डारीले १८ बलमा २ चौका सहित १९ रन जोडे । १९ औं ओभरको पहिलो बलमा शफिगले अहमिद हसनबाट दीपेन्द्र सिंह ऐरीलाई ३९ रनमा क्याच आउट गराए । दीपेन्द्रले ३६ बलमा २ चौका प्रहार गरे ।

माल्दिभ्सका लिम शफिगले ४ ओभरमा ३३ रन खर्चेर ३ विकेट लिए । आमिल माउरुफले २, मोहम्मल महफूज र उमर एडमले १–१ विकेट लिए । कमजोर माल्दिभ्सविरुद्ध नेपालले आफ्नो स्तर अनुसारको ब्याटिङ गर्न सकेन ।