पोखरा (हाम्रो खेलकुद)- १३ औं दक्षिण एसियाली खेलकुद (साग) महिला टि ट्वान्टी क्रिकेट प्रतियोगितामा श्रीलंकाले नेपाललाई १ सय १९ रनको लक्ष्य दिएको छ । पोखरा रंगशालमा टस जितेर ब्याटिङ थालेको श्रीलंकाले निर्धारित २० ओभरमा ७ विकेट गुमाउँदै १ सय १८ रन बनायो ।

सरस्वती कुमारी चौधरीले तेस्रो ओभरको पाँचौ बलमा ओपनर उमिषा थिमाशिनीलालाई डली भट्टबाट २ रनमा क्याच आउट गराएकी थिइन् । नवौं ओभरको अन्तिम बलमा अञ्जली चन्दले कप्तान हर्षिता माधबीलाई सोनु खड्काबाट १६ रनमा क्याच आउट गराएपछि श्रीलंका दबाबमा परेको थियो ।

माधवीले १९ बलमा २ चौका प्रहार गरिन् । १२ औं ओभरको दोस्रो बलमा सोनु खड्काले जानदी आनलीलाई ३५ रनमा बोल्ड आउट गरिन् । उनले ३६ बलमा १ चौका र २ छक्का प्रहार गरिन् । लगतैं अर्को बलमा सोनुले काभिषा दिलहारीलाई शून्यमा एलबी डब्लू आउट गरेपछि टेष्ट टोली श्रीलंकामाथि नेपालले दबाब कायम गरेको थियो ।

१९ ओभरको अन्तिम बलमा लिहिनी अप्सरालाई सरस्वतीले २७ बलमा ५ चौका सहित ३७ रनमा इन्दु बर्माबाट क्याच आउट गराइन् । सत्या सन्दीपनी २२ रनमा रन आउट भइन् । नेपालको लागि सोनु खड्काले ४ ओभरमा १३ रन खर्चेर २ विकेट लिइन् । सरस्वती कुमारी चौधरीले ४ ओभरमा २६ रन खर्चेर २ विकेट लिइन् । अञ्जली चन्दको नाममा १ विकेट रह्यो ।