पोखरा (हाम्रो खेलकुद) – १३ औं दक्षिण एसियाली खेलकुद (साग) महिला टि ट्वान्टी आई क्रिकेटमा माल्दिभ्स श्रीलंकासँग २ सय ४९ रनको फराकिलो अन्तरले पराजित भएको छ । यो श्रीलंका महिला टि ट्वान्टी क्रिकेटमा सर्वाधिक ठूलो जित हो । विश्व क्रिकेटमा टि ट्वान्टी आईमा तेस्रो ठूलो जित पर्दछ । युगान्डाले मालीलाई ३ सय ४ रनको फराकिलो अन्तरले हराएको जित नै महिला टि ट्वान्टीमा सर्वाधिक ठूलो जित पर्दछ ।

माल्दिभ्सका ५ ब्याट्सवुमेनले खाता खोल्न सकेनन् । कप्तान जुना मारियाम ५, सज्जा फाथिमाथ ६, हफ्सा अब्दुल्ला ५ र एसाल इभरहिमले ४ रन जोडिन् । श्रीलंकाकी जान्दी अनलीले ३ र सत्या सन्दीपनीले २ विकेट लिइन् । त्यस अघि पोखरा रंगशालमा टस हारेर ब्याटिङ थालेको श्रीलंकाले निर्धारित २० ओभरमा २ विकेट गुमाउँदै २ सय ७९ रन बनाएको थियो ।

ओपनर उमिषा थिमाशिनी १६ र जान्दी अनली ३२ रनमा आउट भएका थिए । तर कप्तान हर्षिता मादभीले ४७ बलमा १५ चौका र ३ छक्का सहित १ सय ६ रन जोडिन् । सत्या सन्दीपनी ४८ बलमा ११ चौका र ३ छक्का सहित ९६ रनमा अविजित रहिन् । तेस्रो विकेटका लागि थिमाशिनी र सन्दीपनीले २ सय २१ रनको अविजित साझेदारी गरेपछि श्रीलंकाले विशाल योगफल बनाएको थियो । माल्दिभ्सको लागि शाम्मा अली र लात्सा हिलीमथले १–१ विकेट लिइन् ।

माल्दिभ्स पहिलो खेलमा नेपालसँग १० विकेटले पराजित भएको थियो । श्रीलंकालाई बंगलादेशले ७ विकेटले हराएको थियो । माल्दिभ्सले विहीवार बंगलादेशसँग खेल्ने छ । श्रीलंकाले शुक्रवार नेपालसँग प्रतिस्पर्धा गर्ने छ ।