पोखरा (हाम्रो खेलकुद) – १३ औं दक्षिण एसियाली खेलकुद (साग) महिला टि ट्वान्टी क्रिकेट अन्तर्गत दोस्रो खेलमा नेपालले बंगलादेशलाई ५१ रनको सामान्य लक्ष्य दिएको छ । पोखरा रंगशालामा टस हारेर ब्याटिङ थालेको नेपाल १९.२ ओभरमा ५० रनमा अल आउट भयो ।

बंगलादेशको घातक बलिङ सामु नेपालका ५ ब्याट्सवमनले खाता र ३ ले दोहोरो अंक जोड्न सकेनन् । नेपालले पहिलो ओभरको पाँचौ बलमा ओपनर काजल श्रेष्ठलाई शून्यमा गुमाएको थियो । काजललाई जहानारा आलमलले बोल्ड आउट गरिन् ।

जहानाराले पाँचौ ओभरको पहिलो बलमा अर्की ओपनर सिता राना मगरलाई ३ रनमा बोल्ड आउट गरिन् । तेस्रो विकेटका लागि कप्तान रुबिना क्षेत्री बेलबासे र सोनु खड्काले २० रनको साझेदारी गरेका थिए । नवौं ओभरको तेस्रो बलमा सोनुलाई फहिम खातुनले १२ रनमा रबेया खानबाट क्याच आउट गराइन् ।

रबेयाले रुबिनालाई १४ ओभरको दोस्रो बलमा १३ रनमा आउट गरेपछि नेपाल संकटमा परेको थियो । नेपालको विकेट पतन निरन्तर गुमि रह्यो । इन्दु बर्मा १०, ममता चौधरी १, करुण भण्डारी सरिता मगर र अञ्जली चन्दले खाता खोल्नै सकेनन् ।

अप्सरी बेगम ५ रनमा आउट भइन् । बंगलादेशकी रबेया खानले ४ ओभरमा २ मेडन सहित ८ रन खर्चेर ४ विकेट लिइन् । जहानारा आलमले ३ ओभरमा १ मेडन सहित ३ रन खर्चेर २ विकेट लिइन् । सलमान खातुन, नैहिदा अख्तर र फहिम खातुन १-१ विकेट लिइन् ।