एजेन्सी – आसन्न १३ औं दक्षिण एसियाली खेलकुद (साग) को लागि श्रीलंकाले महिला क्रिकेट टोली घोषणा गरेको छ । यू२३ टोली घोषणा गरेको श्रीलंकाको टोलीमा सिनियर टोलीबाट खेलेका ५ खेलाडी रहेका छन् ।

श्रीलंकाकाले सिनियर टोलीकी २१ वर्षिय हर्षिता माधवीको कप्तानीमा टोली घोषणा गरेको छ । घोषणा टोलीमा माधवीसँगै अलराउन्डर कविशा दिलहारी, उमेषा थिमाशिनी, थारिका सेवान्डी र माल्शा शेहानीले वान डे र टि ट्वान्टी आई खेलेका छन् । कप्तान माधवीले १३ वान डे मा २ सय ५३ रन बनाएकी छिन् । त्यस्तै ९ टि ट्वान्टी आईमा ७८ रन जोडेकी छिन् । उप कप्तान काविशाले ४ वान डे मा ५८ रन बनाउनुको साथै ३ विकेट लिएकी छिन् । त्यस्तै ६ टि ट्वान्टीमा ३५ रन बनाउनुको साथै २ विकेट लिएकी छिन् ।

उमेषाले १ वान डे र ५ टि ट्वान्टी आई खेलेकी छिन् । बायाँ हाते तीब्र गतिकी बलर थारिकाले गत फेब्रअरीमा दक्षिण अफ्रिकाविरुद्ध वान डेमा डेब्यू गरेकी थिइन् । माल्शाले समान १ वान डे र टि ट्वान्टी खेली छिन् । ५ सिनियर खेलाडी बाहेक अन्य सबै श्रीलंकाबाट घरेलु क्रिकेटको अनुभव बटुलेका छन् ।

नेपालले पनि एक साता अघि रुविना क्षेत्री बेलबासेको कप्तानीमा सागको लागि अन्तिम टोली घोषणा गरेको थियो । सागमा भारत र पाकिस्तानको महिला टोलीको सहभागिता रहने छैन । साग मंसिर १५ देखी २४ सम्म काठमाडौं, पोखरा र जनकपुरमा हुँदै छ । महिला क्रिकेट टोलीको खेल पोखरामा हुने छ ।

श्रीलंकाको साग महिला टोली :

हर्षिता माधवी (कप्तान), कविशा दिलहारी (उपकप्तान), सत्य सन्दीपनी, उमेषा थिमाशिनी, थारिका सेवान्डी, लिहिनी अप्सरा, जिमान्जाली विजेनयके, सचिनी निसाल्ला, नीलाक्ष्ण सन्दमिनी, शयानी ओशादी, माल्शा शेहानी, थारुका शेहानी, शिकरी निवान्ता, सचिनी डी शिल्भा र जनादी अनाली ।