एजेन्सी – टि टेन लिगमा नेपाली लेग स्पिनर सन्दीप लामिछानेले टि१० लिग अन्तर्गत कर्नाटक टस्कर्सबाट खेल्दै कलन्दर्सविरुद्ध दुई महत्त्वपूर्ण विकेट लिएका छन् । कलन्दर्सले कर्नाटकलाई १ सय ३१ रनको विशाल लक्ष्य दिएको छ ।

टस जितेर ब्याटिङ थालेको कलन्र्दसले १० ओभरमा ७ विकेट गुमाउँदै १ सय ३० रन बनायो । उसका ओपनर तथा विकेटकीपर टम ब्यानटनले विष्फोटक ८० रन जोडे । सन्दीपले एलबीडब्लू आउट गर्नुअघि उनले २८ बलमा ९ चौका र ६ छक्का प्रहार गरे । फिलिप साल्ट ११,लौरी इभान्स १७ र सल्तान अहमदले १३ रन जोडे ।

पाँचौ ओभरमा सन्दीपले २२ रन खर्चेका थिए । सन्दीपलाई पाँच ओभरको पहिलो बलमा चौका, दोस्रो र तेस्रो बलमा इंग्ल्यान्डका युवा ओपनर खेलाडी टम ब्यानटनले छक्का प्रहार गरे । चौथो र पाँचौ बलमा १-१ रन खर्चे । अन्तिम बलमा ब्यानटनले चौका प्रहार गरेपछि उनी महँगो सावित भएका थिए ।

सन्दीपले सातौं ओभरमा उत्कृष्ट पुनरागमन गर्दै २ विकेट लिए । पहिलो बलमा इभान्सलाई १ र दोस्रो बलमा ब्यानटनलाई २ रन दिए । तेस्रो बलमा ब्यानटनले चौका प्रहार गर्दा चौथो बल डट राखे । पाँचौ बलमा सन्दीपले ब्यानटनलाई ८० रनमा एलबी डब्लू आउट गराए । अन्तिम बलमा सन्दीपले टम कोहलर क्याडमोरलाई शून्यमा बोल्ड आउट गरे ।

सम्रगमा सन्दीपले २ ओभरमा ३० रन खर्चेर २ विकेट लिए । अहमद राजा २,नाथन रिममिनटन र केस्रिक विलियमसले १-१ विकेट लिए ।