ढाका (हाम्रो खेलकुद) – नेपाली राष्ट्रिय क्रिकेट टोलीका कप्तान ज्ञानेन्द्र मल्लले एसीसी इमर्जिङ टिम्स एसिया कपमा भएका कमी कमजोरीलाई सुधार गर्दै १३ औं दक्षिण एसियाली खेलकुद (साग) मा राम्रो गर्ने बताएका छन् ।

इमर्जिङ टिम्स एसिया कपमा नेपाल बाहिरिएपछि हाम्रो खेलकुदसँग बोल्दै ज्ञानेन्द्रले नराम्रा कुरालाई बिर्सेर राम्रो कुरालाई सिक्दै सागमा राम्रो गर्ने बताएका हुन् । खेलपछि मल्लले सुरुवाती दुई खेलमा शून्यमा आउट हुँदा आफ्नो मनोबल केहि कमजोर समेत बनेको बताएका छन् ।

‘सुरुवाती दुवै खेलमा शून्यमा आउट भएपछि सुरुमा मनोबल लो नै थियो । क्रिकेट हो, हरके दिन एक हुँदैन भन्ने सोच थियो । सुरुवात राम्रो भएपनि अझ पनि निरन्तरता भएन । राम्रो सुरुवात पाएपछि टिम पनि राम्रो अवस्थामा थियो । विकेट गएपछि खेलमा फर्किननै सकेनौं’, ज्ञानेन्द्रले भने ।

‘यो विकेटमा सुरुसुरुमा गाह्रो हुन्छ । उनीहरुको बलर पनि राम्रो थियो । बंगलादेश सिनियर टोलीबाटै खेलेका बलर थिए । आज हाम्रो टोलीमा ब्याटिङ डेप्थ पनि थियो । एक्स्ट्रा ब्याट्सम्यान लिएर पनि खेलेका थियौं । उनीहरुका बलरले बल टर्न गराइरहे र हाम्रा ब्याट्सम्यानलाई दबाबमा राखे ।’

‘घरेलु मैदानमा हुन लागेको सागमा यो प्रतियोगिताबाट राम्रो कुरा गर्नेछौं’, ज्ञानेन्द्रले भने, ‘ कमजोरी सुधार गरेर कसरी अघि बढ्ने भन्ने सोच हुने छ । टि ट्वान्टी अलि फरक हुन्छ । सागमा घरेलु समर्थकको पनि साथ रहने छ ।’

‘भारत र पाकिस्तान आएका भए हाम्रो क्रिकेटको लागि पनि राम्रो हुन्थ्यो । अरु टिम पनि राम्रै छन्, भारत र पाकिस्तान नहाउँदा वाटो मात्र सहज भएको क्रिकेट भने अझैं खेल्नुपर्छ । लक्ष्य सधैं गोल्ड मेडलनै हो’, उनले भने ।