ढाका (हाम्रो खेलकुद) – नेपाल बंगलादेशमा जारी एसीसी इमर्जिङ टिम्स एसिया कपबाट बाहिरिएको छ । सोमवार समुह चरणको अन्तिम खेलमा बंगलादेशसँग ८ विकेटले पराजित भएको नेपालको झिनो अंकगणितीय संभावना बाँकी रहेको थियो ।

सोमबारनै हङकङलाई भारतले १ सय २० रनले पराजित गरेपछि नेपालको अघिल्लो चरणको संभावना सकिएको हो । बंगलादेश तीन खेलमा तीनमा जित निकाल्दै समुह बी को विजतो बन्यो । बंगलादेशले समुह चरणमा हङकङलाई ९ विकेट र भारतलाई ६ विकेटले हराएको थियो । भारत तीन खेलमा २ मा जित र १ मा हारका साथ उप विजेताको रुपमा सेमिफाइनलमा प्रवेश गरेको छ ।

समुह ए बाट पाकिस्तान विजेता र अफगानिस्तान उप विजेतका रुपमा सेमिफाइनलमा पुगेका छन् । पाकिस्तानले ३ खेलमा ३ मै जित निकाल्दै शीर्ष स्थानमा रह्यो । त्यस्तै अफगानिस्तान ३ खेलमा २ मा जित र १ मा हारका साथ उप विजेता हुँदै सेमिफाइनलमा पुगेको हो । ओमान तेस्रो र श्रीलंका जितविहीन हुँदै पुछारमा रहेर बाहिरियो ।

अब सेमिफाइनलमा बुधबार भारत र पाकिस्तान भिड्ने छन् । विहीबार दोस्रो सेमिफाइनलमा अफगानिस्तान र बंगलादेशबीच प्रतिस्पर्धा गर्ने छन् । फाइनल शनिवार हुने छ ।

नेपाल पहिलो खेलमा भारतसँग ७ विकेटले पराजित भएको थियो । दोस्रो खेलमा नेपालले हङकङलाई ४० रनले हराएको थियो । अन्तिम समयमा यूएईले आन्तरिक कारण आफ्नो नाम फिर्ता लिएपछि नेपालले इमर्जिङ कप खेल्न पाएको थियो । तर पतियोगितामा नेपालको प्रर्दशन कमजोर रहयो ।