ढाका (हाम्रो खेलकुद) – एसीसी इमर्जिङ टिम्स एसिया कप क्रिकेट प्रतियोगितामा नेपालले समुह चरणको अन्तिम खेलमा घरेलु टोली बंगलादेशलाई १ सय ३९ रनको सामान्य लक्ष्य दिएको छ ।

टस हारेर ब्याटिङ थालेको नेपाल ४४.३ ओभरमा  १ सय ३८ रनमा अल आउट भयो । नेपालका लागि तल्लोक्रमका सोमपाल कामीले ६३ बलमा ४ चौका सहित ३८ रनको सर्वाधिक योगदान दिए । ओपनर कुशल भुर्तेलले २२ बलमा १ चौका सहित १० रनमा आउट भए । भुर्तेललाई सातौं ओभरको पाँचौ बलमा सुमन खानले सर्ट मिड अनमा सैयद मिन्हाजुल आबेदीनबाट क्याच आउट गराए ।

कप्तान ज्ञानेन्द्र मल्ल २७ बलमा ४ चौका सहित २२ रनमा आउट भए । ज्ञानेन्द्रलाई सुमनले नै नवौं ओभरको अन्तिम बलमा स्क्वायर लेग बाउन्ड्रीमा मेहदी हसनबाट क्याच आउट गराए । ज्ञानेन्द्र र कुशलले पहिलो विकेटका लागि ६.५ ओभरमा ३३ रनको साझेदारी गदै राम्रो सुरुवात दिएपनि त्यसपछि निरन्तर विकेट पतन हुँदा नेपाल सस्तैमा समेटिएको हो । दशौं ओभरको दोस्रो बलमा तनवीर इस्लामले शरद भेषवकरलाई माहिदुल इस्लाम भुइयानबाट क्याच विहान्ड आउट गर्दै १ रनमा पेभिलिएन फर्काए ।

तनविरलेनै १४ औं ओभरको चौथो बलमा उप कप्तान दीपेन्द्र सिंह एरीलाई सुमनबाट ६ रनमा क्याच आउट गराएपछि नेपाल ४६–४ को कमजोर अवस्थामा पुगेको थियो  । २१ ओभरको चौथो बलमा आरिफ शेखलाई मेहदी हसनले सुमनबाट ११ रनमा क्याच आउट गराए । आरिफले ३९ बलको सामना गरे । लगत्तै २२ औं ओभरको तेस्रो बलमा मिन्हाजुल आबेदीनले सन्दीप जोरालाई शून्यमा एलबी डब्लू आउट गराए ।

२४ औं ओभरको दोस्रो बलमा सैयद मिन्हाजुल आबेदीनले पवन सरार्फलाई ९ रनमा एलबी डब्लू आउट गरे । आबेदीनलेनै विकेटकीपर विनोद भण्डारीलाई ८ रनमा एलवी डब्लू आउट गरे । नवौं विकेटका लागि सोमपाल कामी र करण केसीले ५० रनको साझेदारी गर्दै सम्मानजक योगफल सम्म पुर्याएका थिए । करणलाई मेहदी हसनले ४४ औं ओभरको पहिलो बलमा यासिर अलीबाट १८ क्याच गराउँदै साझेदारी तोडेका थिए ।

करणले ४७ बलमा १ चौका र छक्का प्रहार गरे । बंगलादेशका सैयद मिन्हाजुल आबेदीनले १० ओभरमा २९ रन खर्चेर ३ विकेट लिए । तनविर सिंहले १० ओभरमा २ मेडन सहित २६ रन खर्चेर २ विकेट लिए । सुमन खानले ८.३ ओभरमा २९ रन खर्चेर ३ विकेट लिए । मेहदी हसनले ९ ओभरमा १ मेडन सहित २५ रन खर्चेर २ विकेट लिए ।