ढाका (हाम्रो खेलकुद) – एसीसी इमर्जिङ टिम्स एसिया कप क्रिकेट प्रतियोगितामा नेपालले समुह चरणको अन्तिम खेलमा घरेलु टोली बंगलादेशविरुद्ध रन जोड्न संघर्ष गरिरहेको छ ।

टस हारेर ब्याटिङ थालेको नेपालले २५ ओभरमा ७ विकेट गुमाउँदै मात्र ७८ रन बनाएको छ । ओपनर कुशल भुर्तेल २२ बलमा १ चौका सहित १० रनमा आउट भए । भुर्तेललाई सातौं ओभरको पाँचौ बलमा सुमन खानले सर्ट मिड अनमा सैयद मिन्हाजुल आबेदीनबाट क्याच आउट गराए ।

कप्तान ज्ञानेन्द्र मल्ल २७ बलमा ४ चौका सहित २२ रनमा आउट भए । मल्ललाई सुमन खानले नवौं ओभरको अन्तिम बलमा स्क्वायर लेग बाउन्ड्रीमा महदी हसनबाट क्याच आउट गराए । मल्ल र भुर्तेलले पहिलो विकेटका लागि ६.५ ओभरमा ३३ रनको साझेदारी गदै राम्रो सुरुवात दिएपनि २ रन जोडन ३ विकेट गुमाएपछि नेपाल दबाबमा परेको थियो ।

दशौं ओभरको दोस्रो बलमा तनवीर इस्लामले शरद भेषवकरलाई माहिदुल इस्लाम भुइयानबाट क्याच विहान्ड आउट गर्दै १ रनमा पेभिलिएन फर्काए । तनविरलेनै १४ ओभरको चौथो बलमा उप कप्तान दीपेन्द्र सिंह एरीलाई सुमनबाट ६ रनमा क्याच आउट गराएपछि नेपाल ४६– ४ को कमजोर अवस्थामा पुगेको छ । नेपालको विकेट पतन यतिकैमा रोकिएन ।

२१ ओभरको चौथो बलमा आरिफ शेखलाई महदी हसनले सुमनबाट ११ रनमा क्याच आउट गराए । आरिफले ३९ बलको सामना गरे । लगत्तै २२ ओभरको तेस्रो बलमा मिनहाजुल आबेदीनले सन्दीप जोरालाई शून्यमा एलबी डब्लू आउट गराए । २४ ओभरको दोस्रो बलमा सैयद मिन्हाजुल आबेदीले पवन सरार्फलाई ९ रनमा एलबी डब्लू आउट गरे । क्रिजमा विकेटकीपर विनोद भण्डारी ५ र सोमपाल कामी ६ रनमा खेलिरहेका छन् ।