एजेन्सी – नेपाली लेग स्पिनर सन्दीप लामिछानेको उत्कृष्ट प्रर्दशनको बाबजुद टि टेन लिगमा कर्नाटक टस्कर्र्स बंगला टाइगर्ससँग ५ विकेटले पराजित भएको छ । १ सय १५ रनको विजयी लक्ष्य पछ्याएको बंगला टाइगर्सले ८.५ ओभरमा ५ विकेट गुमाउँदै पुरा गर्यो ।

उसका लागि ओपनर आन्द्रे फ्लेचरले १५ बलमा ५ छक्का र १ चौका सहित ४० रनको योगदान दिए । त्यस्तै अर्का ओपनर रिले रोसोव १० बलमा २ छक्का र १ चौका सहित २२ रन जोडे । ३.२ ओभरमा आन्द्रे र रिलेले ५५ रनको उत्कृष्ट साझेदारी गर्दै राम्रो सुरुवात दिलाएका थिए । कोलिन इनग्राम ४, थिसेरा परेरा ३ रनमा आउट हुँदा टम मोरेस २८ रनमा अविजित रहे । टमले तल्लोक्रममा ९ बलमा १ चौका र ३ छक्का प्रहार गर्दै जित पक्का गरे । सन्दीपले २ ओभरमा ९ रन खर्चेर २ महत्वपूर्ण विकेट लिएपनि टोलीको हार टार्न सकेनन् । शपुर जद्रान र अहमद राजाले १-१ विकेट लिए ।

सन्दीपले चौथो ओभरको पहिलो बलमा आन्द्रे फ्लेचरलाई डट राखे । दोस्रो बलमा सन्दीपले विकेटकीपर शफिकउल्लाह शफिकबाट स्टम्पिङ आउट गराउँदै टोलीलाई महत्वपूर्ण सफलता दिलाएका थिए । तेस्रो बलमा कोलिन इनग्रामलाई डट राख्दा चौथोमा १ रन दिए । पाँचौ बलमा रिले रोसौवले चौका र अन्तिम बलमा १ रन दिए ।

सन्दीपले छैटौं ओभरमा ४ रन खर्चेर १ विकेट लिए । छैटौं ओभरको पहिलो बलमा थिसेरा परेरा र दोस्रो बलमा इनग्रामलाई १-१ रन दिए । तेस्रो बल कप्तान परेरालाई डट र चौथोमा १ रन दिए । पाँचौ बलमा १ रन लिने क्रममा कप्तान हसिम अमलाले डाइरेक्ट थ्रोमा इनग्रामलाई रन आउट गराए । अन्तिम बलमा सन्दीपले परेरालाई लङ अनमा हसिमबाट क्याच गराउँदै टोलीलाई खेलमा फर्काएका थिए ।

त्यअघि आबुधाबीमा टस हारेर ब्याटिङ थालेको कर्नाटकले १० ओभरमा १ विकेटको क्षतिमा १ सय १४ रन बनायो । ओपनर जोनसन चाल्र्सले २९ बलमा समान ४ चौका र छक्का सहित ५७ रनको योगदान दिए । त्यस्तै कप्तान हसिम अमला २९ बलमा ६ चौका सहित ४७ रनमा अविजित रहे । पहिलो विकेटका लागि अमला र चाल्र्सले ८।२ ओभरमा ९७ रनको साझेदारी गर्दै विशाल योगफल सम्म पुर्याएका थिए ।

रोश वेश्टेटली २ रनमा अविजित रहे । पहिलो खेलमा दिल्ली बुल्सविरुद्ध २ ओभरमा १९ रन खर्चेर १ विकेट लिएका थिए । तेस्रो खेलमा कर्नाटकले सोमबार डेक्कन डेक्कन ग्लैडिएटर्ससँग खेल्ने छ ।