एजेन्सी – यू१९ च्यालेन्जर एक दिवसिय सिरिजमा तेस्रो स्थानको लागि भएको खेलमा नेपाली युवा टोली भारतको ‘सी’ सँग १ सय ५५ रनको फराकिलो अन्तरले पराजित भएको छ ।

योसँगै नेपाल यू१९ च्यालेन्जर सिरिजमा जित बिहीन बनेको छ । लिग चरणमा नेपाल भारत सी सँग १० विकेटले हारेको थियो । लिग चरणमै भारत ए सँग १ सय ७ रन र भारत बी सँग २ विकेटले पराजित हुन पुगेको थियो ।

भारत ‘सी’ ले प्रस्तुत गरेको २ सय ५९ रनको लक्ष्य पछ्याएको नेपाल ३२.५ ओभरमा अल आउट हुँदै १ सय ३ रनमा समेटियो । नेपालका कप्तान रित गौतम र विशाल विक्रम केसीले खातै खोल्न सकेनन् ।

लोकेश बम ६, तृतराज दाश १९, खडक बहादुर बोहरा २६, हरि बहादुर चौहान २, शेर मल्ल ९, कुशल मल्ल २६ र विवेक कुमार यादवले ६ रन जोडे । भारत सी का लागि कप्तान शुभांग सामर्थले ३, रवि रोशन, प्रदोश रञ्जन पल र विद्यादर पटेलले समान २ विकेट लिए ।

त्यसअघि टस जितेर ब्याटिङ थालेको भारत सी ले निर्धारित ५० ओभरमा ६ विकेट गुमाउँदै २ सय ५८ रन बनाएको थियो। भारत सी का लागि ब्रिकान्त सिंह भदेरियाले ४९ बलमा ४ चौका र २ छक्का सहित ५० रन जोडे ।

त्यस्तै सौरभ कुमार डागरले ६० बलमा २ चौका र ३ छक्का सहित ५८ रनमा अविजित रहे । कप्तान शुभांग समर्थ हेगडे ३६ रनमा अविजित रे । छैटौ ओभरको पहिलो बलमा ओपनर अर्जुन ए अजादलाई विवेव कुमार यादवले १९ रनमा क्याच आउट गराएका थिए ।

त्यस्तै अर्यान सिट्टीलाई कुशल मल्लले सागर ढकालबाट ३१ रनमा क्याच आउट गराए । उनले ४९ बलमा ४ चौका प्रहार गरे । प्रदोस रञ्जन पल १४, श्रवात रावत १७ र कुमार के कुशग्रा २७ रनमा क्याच आउट भए ।

नेपालका लागि स्पिनर सागर ढकालले १० ओभरमा ३७ रन खर्चेर ३ विकेट लिए । कुशल मल्ल २ र विवेक कुमार यादवले १ विकेट हात पारे ।