ढाका (हाम्रो खेलकुद) – एसीसी इमर्जिङ टिम्स एसिया कपमा नेपालले आफ्नो दोस्रो खेलमा हङकङसँग खेल्दै छ । खेल नेपाली समय अनुसार विहान ८:४५ देखी सुरु हुने छ ।

दुुवै टोली पहिलो जितको खोजिमा छन् । पहिलो खेलमा नेपाल भारतसँग ७ विकेटले पराजित हुँदा हङकङ बंगलादेशसँग ९ विकेटले पराजित गरेको थियो । जुन खेलमा बंगलादेशका सौम्य सरकारले ८४ र मोहम्मद नइमले ५२ रन जोडेका थिए । हङकङका बलरले कमजोर प्रर्दशन गरेका थिए । १ सय ६५ रनको लक्ष्य बंगलादेशले २५ ओभरको भेट्टाएको थियो ।

हङकङले बंगलादेशविरुद्ध ५० ओभरमा ९ विकेट गुमाउँदै १ सय ६४ रन जोडेको थियो । उसका हारोन अशराद ३५, कप्तान ऐजाज खान २५, वाजिद शाह १७ र केडी शाहले २४ रन जोड्न बाहेक कसैले राम्रो प्रर्दशन गर्न सकेका थिएनन् । बाबर हायात र अंशुमन रथले हङकङ छाडेपछि टोली कमजोर बनेको छ ।

यता नेपाललाई शीर्षक्रमको ब्याटिङकै चिन्ता छ । कप्तान ज्ञानेन्द्र मल्लको खराब लय अर्को चिन्ताको विषय हो । मल्ल भारतसँग दोस्रो बलमै शून्यमा आउट भएका थिए । खराब लयका कारण आलोचित भई रहेका मल्ललाई ठुलो इनिङ खेल्नुपर्ने दबाब छ । मल्लको जोडीको रुपमा कुशल भुर्तेललेनै निरन्तरता पाउने छन् । उनले भारतविरुद्ध डेब्यूमा २८ रन जोडेका थिए । दीपेन्द्र ऐरीले पनि ठूलो इनिङ खेल्न सकेका छैनन् । भारतविरुद्ध २ रनमा आउट भएका आरिफ शेखलाई पनि ठूलो इनिङ खेल्न दबाब छ ।

भारतविरुद्ध ४४ रन जोडेका अनुभवी ब्याट्सम्यान शरद भेषवाकरबाट टोलीले ठूलो आशा राखेको छ । यता युवा अलराउन्डर पवन सरार्फ आजको खेलमा पनि नायक बन्न सक्छन् । पवनले भारतविरुद्ध ५६ रन जोड्दै नेपाललाई सम्मानजक योगफलसम्म युर्याएका थिए । नेपालले लिएको तीन मध्य २ विकेट स्पिनरले लिएका थिए ।

टोलीमा खासै परिवर्तनको संभावना देखिदैन । भारतसँगको खेलमा उतारेको टोलीलाईनै निरन्तरता दिने संभावना छ । नेपालले आजको खेलमा पनि प्रमुख ४ स्पिनर र ७ ब्याट्सम्यानलाई खेलाउने संभावना बलियो छ । आजको खेलमा पराजित हुने टोलीको अघिल्लो चरणको संभावना सकिने छ । त्यसैले सेमिफाइनको आशा कायमै राख्न नेपाललाई आजको खेल जित्नै पर्ने दबाब छ ।