एजेन्सी – ओपनर मयंक अग्रवालले दोहोरो शतक प्रहार गरेपछि बंगलादेशसँगको पहिलो टेष्टमा घरेलु टोली भारतले विशाल अग्रता लिएको छ । दोस्रो दिनको खेल सकिदा भारतले ३ सय ४३ रनको अग्रता लिएको छ ।

दोस्रो दिनको खेल सकिदा भारत १ सय १४ ओभरमा ४९३-६ को अवस्थामा रहेको छ । ओपनर मयंक अग्रवालले ३ सय ३० बलमा २८ चौका र ८ छक्का सहित २ सय ४३ रनको योगदान दिए । उनलाई १ सय ७ ओभरको तेस्रो बलमा युवा स्पिनर मेहदी हसनले अबु जायदबाट क्याच आउट गराएका थिए । यो अग्रवालको टेष्ट करिअरकै उच्च प्रर्दशन हो । टेष्ट करिअरमा उनको यो दोस्रो दोहोरो शतक हो ।

खेलपछि पत्रकार सम्मेलनमा मयंकलाई दिनभरको मिहिनेतपछि के गर्ने गरेको छ भनेर प्रश्न गरिएको थियो । प्रश्नकर्ताले जिज्ञासा राख्दै सिनेमा हेर्ने गरेको छ कि विश्राम भनेर सोधेका थिए । तर मयंकले हाँस्दै आफूले पब्जी खेल्ने गरेको बताए । बंगलादेशविरुद्ध दोहोरो शतक बनाएकाउनले  यसअघि गत अक्टोबरमा दक्षिण अफ्रिकासँगको पहिलो टेष्टमा २ सय १५ रन जोडेका थिए ।

ओपनर रोहित शर्मा ६ र चेतेश्वर पुजारा ५४ रनमा आउट भए । कप्तान विराट कोहलीले खाता खोल्न सकेनन् । कोहलीलाई अबु जायदले एलबी डब्लू आउट गर्दै शून्यमा पेभिलिएन फर्काएका थिए । अजिंक्या रहाणेले १ सय ७२ बलमा ९ चौका सहित ८६ रन बटुले । चौथो विकेटका लागि अग्रवाल र रहाणेले १ सय ९० रनको साझेदारी गरेका थिए । रविन्द्र जडेजा ७६ बलमा ६ चौका र २ छक्का सहित ६० र उमेश यादव २० रनमा अविजित छन् । बंगलादेशका अबु जायदले ४ र मेहदी हसन र एबादत हसनले १–१ विकेट लिए ।

त्यसअघि पहिलो दिन टस जितेर ब्याटिङ थालेको बंगलादेश ५८.३ ओभरमा अल आउट हुँदै १ सय ५० रनमा सेटिएको थियो । बंगलादेशका मुश्फिकुर रहीमले ४३, कप्तान मोमिनुल हक ३७ र विकेटकीपर लिटन दासले २१ रन जोड्न बाहेक अन्यले राम्रो प्रर्दशन गर्न सकेनन् । भारतका मोहम्मद शमाीले ३, रविचन्द्रन आश्विन, उमेश यादव र इशान्त शर्माले समान २ विकेट लिए ।