काठमाडौं (हाम्रो खेलकुद) – यूएईमा शुक्रबारदेखि टि१० लिग सुरु हुँदैछ । लिगमा नेपाली राष्ट्रिय टोलीका पुर्व कप्तान पारस खड्का र सन्दीप लामिछानेको सहभागिता रहेको छ ।

पारस टिम अबु धाबी र सन्दीप लामिछाने कर्नाकट टस्कर्सबाट टि१० लिग खेल्ने छन् । दुबै खेलाडी आफ्नो टोलीसँग जोडिएर अभ्यास गरि सकेका छन् । पारस सम्मिलित टिम अबुधाबीले आज पहिलो खेलमा कलन्दर्ससँग खेल्दै छ । खेल १०:४५ बाट यूएईको शेख जायद स्टेडियममा सुरु हुने छ । पारस पहिलो खेलमै पहिलो रोजाईमा पर्ने संभावना बलियो छ ।

पारसले टि ट्वान्टीमा ब्याटिङमा ओपनिङ र मध्यक्रम दुवैतर्फ नेपालबाट खेलिसकेका छन् । पारस ओपनिङमा अझ बढि सफल भएको पाइन्छ । पारसले नेपालको ओपनिङ सुधार गर्नको लागि गत माघमा यूएईसँगको टि ट्वान्टी सिरिजदेखि ओपनिङमा आएका थिए । दुई महिना अघि सिंगापुरविरुद्ध लक्ष्य पछ्याउने क्रममा १ सय ६ रन जोड्दै विश्वकीर्तिमान समेत रचेका थिए । पारसले पार्ट टाइम बलरको रुपमा मध्य र स्पिन बलिङ गर्ने गर्छन ।

पारसको टोलीमा इंग्ल्यान्डका अलराउन्डर मोइन अली आइकन खेलाडी हुन् । पारसले ओपनिङनै गर्ने संभावना छ । टि टेन भएको कारण सुरुवाती बल देखिनै आक्रमक खेल्नुपर्ने हुन्छ । त्यसैले ब्याटिङअडरमा खासै फरक पर्ने छैन । अलराउन्डर लुक राईट र श्रीलंकाली विकेटकीपर निरोशन डिकवेलाको स्थान पक्का जस्तै छ । बायाँ हाते कोरी एन्डरसन मध्यक्रम ब्याटिङ समाल्ने छन् । टि टेनमा एक बलरले दुई ओभर बलिङ गर्ने हुँदा टोलीमा धेरै अलराउन्डर हुने छन् ।

अर्कोतर्फ पारसले नेपाली टोलीमा उत्कृष्ट प्रर्दशन गर्दै आएका छन् । पारसको लय पनि उत्कृष्ट छ । एसोशिएट स्टारको रुपमा परिचित पारसको नेतृत्व क्षमता पनि उत्कृष्ट छ । टिम अबुधाबीमा ठूला नाम गरेका कुनै पनि ओपनर छैनन् । धेरै खेलाडीले नियमित आफ्नो देशबाट पनि खेलका छैनन् । त्यसैले पारसको संभावना बलियो देखिन्छ ।

उता कलन्दर्सको टिममा पाकिस्तानका पुर्व कप्तान शाहिद अफ्रिदी आइकन खेलाडी रहेका छन् । इंग्ल्यान्डका डेविड मालन टोलीका कप्तान हुन् । क्रिस जोर्डन, टम ब्यान्टन, मोहम्मद हफिज, लाहिरु कुमारा, मुजिव उर रहमान, फहिम असरार्फ, इमाद वासिम र लुकी रोन्ची जस्ता ठूला नाम गरेका खेलाडी छन् ।

टिम अवुधाबीको पूर्ण टोली :

लुकी राइट, बेन लाफलिन, मोहम्मद आमिर, हेरि गुर्नी, मोइन अली(आइकन), लुइस ग्रेगरी, निरोशन डिकवेला (विकेटकीपर), एलेक्स डभिस, कोरी एन्डरसन, रोहन मुस्तफा, पारस खड्का, रिचर्ड ग्लासेन, रामिज शहजाद र हेडन वाल्श ।