एजेन्सी – भारतको हैदरावादमा जारी यू१९ च्यालेन्जर एक दिवसिय सिरिजमा नेपाल भारत बी सँग २ विकेटले पराजित भएको छ । नेपालको यो लगातार तेस्रो हार हो । नेपाल यसअघि पहिलो खेलमा भारत सी सँग १० विकेट र दोस्रो खेलमा भारत ए सँग १ सय ७ रनले पराजित भएको थियो ।

नेपालले प्रस्तुत गरेको २ सय ११ रनको विजयी लक्ष्य पछ्याएको भारत बी ले ४६.३ ओभरमा ८ विकेट गुमाउँदै पुरा गर्यो । उसका दिब्यंश जे जोशीले ३७ बलमा समान ४ चौका र छक्का प्रहार गरे । त्यस्तै कृष्ण सिट्टीले ७५ बलमा २ चौका सहित ३९ रनको योगदान दिए । पहिलो ओभरको पाँच बलमा आकश चन्दले ओपनर सिद्धेश अशोक बिरलाई विशाल विक्रम केसीबाट क्याच गराउँदै १ रनमा क्याच आउट गराए ।

पाँचौ ओभरको पाँचौ बलमा आकशलेनै यश विजयलाई ६ रनमा एलबी डब्लू आउट गरे । १८ ओभरको अन्तिम बलमा स्पिनर कुशल मल्लले सुरेन्द्र कुमारलाई २८ रनमा तृतराज दासबाट क्याच आउट गराए । उनले ४१ बलमा २ चौका प्रहार गरे । लगत्तै १९ ओभरको दोस्रो बलमा सागर ढकालले हर्ष राजेश जमवललाई २९ रनमा क्याच आउट गराएपछि नेपालले राम्रो सुरुवात गरेको थियो ।

तल्लो क्रममा जोशी र कृष्णले उत्कृष्ट प्रर्दशन गर्दै भारतलाई हार बाट बचाए । निर्मल कुमार २० र विवेक नरेश कुमारले १६ रनको योगदान दिए । नेपालका तीब्र गतिका बलर आकश चन्दले ८ ओभरमा ४१ रन खर्चेर ४ विकेट लिए । स्पिनर सागर ढकालले १० ओभरमा ३१ रन खर्चेर २ विकेट लिए । कुशल मल्ल र शेर मल्लको नाममा १-१ विकेट रह्यो ।

त्यसअघि टस हारेर ब्याटिङको निम्तो पाएको नेपाल ४९.५ ओभरमा २ सय १० रनमा अल आउट भएको थियो । नेपालका रित गौतमले सर्वाधिक ८४ रनको योगदान दिएपनि टोलीको हार टार्न सकेनन् । ३२ ओभरको तेस्रो बलमा अथर्व विनोद अनकोलेकरले क्याच आउट गराउनु अघि रितले ९३ बलमा १२ चौका र १ छक्का प्रहार गरे । तेस्रो ओभरको अन्तिम बलमा ओपनर लोकश बमलाई अकीब खानले ५ रनमा क्याच आउट गराएका थिए ।

तृतराज दास छैटौं ओभरको तेस्रो बलमा २ रनमा रन आउट भए । दशौं ओभरको चौथो बलमा अघिल्लो खेलमा उत्कृष्ट प्रर्दशन गरेका विशाल विक्रम केसी ३ रनमा क्याच आउट हुन पुगे । अभिषेक बस्नेतले खातै खोल्न सकेनन् । उनलाई दिब्यशं जोशीले १३ ओभरको पहिलो बलमा बोल्ड आउट गरेका थिए ।

२४ औं ओभरको पहिलो बलमा विकेटकीपर हरि बहादुर चौहान २० बलमा बोल्ड आउट भए । अथर्व विनोदले कुशल मल्ललाई १२ रनमा क्याच आउट गराए । तल्लोक्रममा शेर मल्ल ४७ बलमा ३ चौका सहित ३३ रन जोडे ।

त्यस्तै आकश चन्दले ४२ बलमा २ चौका सहित १८ रनको योगदान दिए । सागर ढकाल ९ रनमा अविजित रहे । गौतम केसी ५ रनमा आउट भए । भारत बी का लागि दिब्यंश जोशीले ३, अथर्व विनोद अनकोलेकर २, अकीब खान, नरेश खान र नर्मल कुमारले समान १ विकेट लिए । नेपालले अव तेस्रो स्थानको लागि भारत ए वा भारत सी मध्य एक टोलीसँग खेल्ने छ । भारत बी भने तीनै खेल जित्दै फाइनलमा पुगेको छ ।