काठमाडौं (हाम्रो खेलकुद) – घरेलु मैदानमा हुने १३ औं दक्षिण एसियाली खेलकुद (साग) को लागि नेपाली राष्ट्रिय क्रिकेट टोलीको घोषणा भएको छ ।

विहीबार घोषणा भएको टोलीमा तीब्र गतिका बलर राशिद खान पहिलो पटक परेका छन् । राशिद बाहेक टोलीमा सबै पुरानै अनुहार रहेका छन् । साग मंसिर १५ देखी २४ सम्म काठमाडौं र पोखरामा हुने छ । घोषणा टोलीमा पुर्व कप्तान पारस खड्का र लेग स्पिनर सन्दीप लामिछाने पनि रहेका छन् ।

तीब्र गतिका बलर राशिद खानले पहिलो पटक सिनियर टोलीमा स्थान बनाएका छन् । राशिदले उमेर समुह र घरेलु क्रिकेटमा निरन्तर उत्कृष्ट प्रर्दशन गर्दै आएका छन् ।

इमर्जिङ एसिया कपमा रहेका ओपनर इशान पाण्डे र विश्वकीर्तिमानी युवा खेलाडी रोहित कुमार पौडेल टोलीमा छैनन् । त्यस्तै वसन्त रेग्मी पनि टोली बाहिर रहेका छन् । टोलीमा युवा खेलाडीको बाहुल्याता छ ।

सागको लागि नेपाली टोली :

ज्ञानेन्द्र मल्ल(कप्तान), पारस खड्का, सन्दीप लामिछाने, दीपेन्द्र सिंह ऐरी, सोमपाल कामी, करण केसी, विनोद भण्डारी, ललित नारायण राजवंशी, पवन सरार्फ, सन्दीप जोरा, सुसन भारी, आरिफ शेख, अभिनास बोहोरा, कुशल भुर्तेल र राशिद खान ।

वैकल्पिक सुचिमा :

रोहित कुमार पौडेल, भिम सार्की र सागर ढकाल ।