काठमाडौं (हाम्रो खेलुकद)– वीरगञ्ज प्रिमियर लिग (विपिएल) टि ट्वान्टी क्रिकेट प्रतियोगिताका मार्की खेलाडी सार्वजनिक भएको छ । प्रतियोगिता विरगञ्जको नारायणी क्रिकेट मैदानमा मंसिर १४ देखि २१ सम्म सञ्चालन हुने छ । प्रतियोगिताको लागि आयोजक युनाइटेड क्रिकेट क्लबले ६ टिमका ६ मार्की खेलाडी सार्वजनिक गरेको हो ।

गिनीज बुकमा नाम लेखाउन सफल खेलाडी महबुब आलम सिंह ११ लायन्सका मार्की खेलाडी रहेका छन् । अनुभवी ओपनर हसिम अन्सारी वीरगन्ज स्टार, युवा स्टार राशिद खान डीसीसी स्टार, सिनियर टोलीबाट खेली सकेका ओपनर विकेटकीपर अनिल कुमार शाह ड्रार्गन साहिब दरबार, तीब्र गतिका बलर जितेन्द्र मुखिया रौतहट राइनोज र सुरज पेटल केआईइसी वीरगञ्जको मार्की खेलाडीको रुपमा रहेका छन् ।

अक्सनमा कुल १ सय ९९ खेलाडीले नाम दर्ता गराएका छन् । अक्सन आगमी शनिवार हुने छ । प्रतियोगिताको विजेताले २ लाख ५० हजार र दोस्रो हुने टोलीले १ लाख ८० हजार रुपैयाँ प्राप्त गर्नेछ । म्यान अफ द सिरिजले २० हजार रुपैयाँ प्राप्त गर्ने प्रतियोगिताको उत्कृष्ट ब्याट्सम्यान र बलरले समान १० हजार पाउनेछन् ।

८ दिन चल्ने प्रतियोगितामा प्रदेश २ का खेलाडीमात्र प्रतिस्पर्धा गर्न पाउने आयोजकले जनाएको छ । प्रत्येक खेलको म्यान अफ द म्याचले १ हजार ५ सय प्राप्त गर्ने छन् । ब्याट्सम्यानले छक्का प्रहार गरेको बल एक हातले क्याच लिने दर्शकले प्रत्येक क्याचको २ हजार रुपैयाँ पाउनेछन् ।