ढाका (हाम्रो खेलकुद) – नेपाली राष्ट्रिय क्रिकेट टोलीका उप कप्तान दीपेन्द्र सिंह ऐरीले एसीसी इमर्जिङ एसिया कपमा दुई शतक प्रहार गर्ने लक्ष्य राखेको बताएका छन् ।

बंगलादेशमा बुधबार अभ्यासको क्रममा दीपेन्द्रले हाम्रोखेलकुद सँग कुरा गर्दै यस्तो बताएका हुन् । दीपेन्द्रले पछिल्लो समय अपेक्षा अनुसार प्रर्दशन गर्न सकि रहेका छैनन् । शीर्षक्रमका प्रमुख ब्याट्सम्यान र वैकल्पिक स्पिनरका रुपमा पछिल्लो दुई वर्षमा सिनियर टोलीमा प्रमुख खेलाडीको रुपमा स्थान बनाउँदै आएका छन् ।

दुई वर्षअघि नेपालले यू१९ एसिया कपमा भारतलाई १९ रनले हराउँदै इतिहास कप्तान दीपेन्द्रले ब्याटिङ र बलिङ दुबैमा जादुमय प्रर्दशन गरेका थिए । इमर्जिङ कपमा दीपेन्द्रलाई रन बनाउनु पर्ने दबाब रहनेछ । लयमा फर्किने दीपेन्द्रलाई राम्रो अवसर पनि हो । इमर्जिङ एसिया कपमा भारतसँग खेल्नुअघि दीपेन्द्रले तीन खेल मध्य दुई खेलमा शतक हान्ने लक्ष्य राखेको बताएका छन् । ‘शीर्षक्रमका ब्याट्सम्यान भएपछि रन हान्नुपर्ने हुन्छ । मैले प्रर्दशन गरिन भने टिमलाई असर पर्छ । रन नहानेर दबाब परेको चाहिँ होइन,’उनले भने ।

दीपेन्द्रले बंगलादेशमा तयारी राम्रो भएको बताएका छन् । ‘नेपाल र बंगलादेशको विकेट फरक छ । भारत टेष्ट नेशन हो । उनीहरुसँग खेल्दा अनुभव फरक हुन्छ । यू१९ मा उनीहरुलाई हामीले धेरै राम्रो खेलेर जितेका हौं’,दीपेन्द्रले भने ।

दीपेन्द्रले आफुले पछिल्लो समय राम्रो प्रर्दशन गर्न नसकेको सहजै स्वीकार गर्दछन् तर खराब लय भने चाहि नरहेको बताएका छन् । ‘हरेक खेलको अवस्था हेरि दवावलाई सम्हालेर खेल्नुपर्ने हुन्छ । धेरै खेलमा राम्रो प्रर्दशन गर्न सकिरहेको छैन । समुह चरणमा सकेसम्म तीनै खेल जित्ने र नसके दुइ जितेर सेमिफाइनल पुग्ने लक्ष्य राखेका छौं’, दीपेन्द्रले भने ।