काठमाडौं (हाम्रो खेलकुद) – नेपाली यू१९ टोलीले भारतको हैदराबादमा जारी यू१९ एकदिवसिय च्यालेन्जर ट्रर्फिमा भारत ए विरुद्ध पहिला बलिङ गर्ने भएको छ ।

राजिव गान्धी इन्टरनेशनल स्टेडियम हैदराबादमा कप्तान रित गौतमले टस जितेर पहिला बलिङ गर्ने निर्णय लिएका छन् । नेपाली टोलीमा एक परिवर्तन भएको छ । भारत सी विरुद्ध खेलेका लेग स्पिनर तिलक राज भण्डारीको स्थानमा अलराउन्डर विशाल बिक्रम केसी आएका छन् । पहिलो खेलमा भारत सी विरुद्ध तिलकले ४ ओभर बलिङ गर्दै २८ रन खर्चिएका थिए ।

उक्त खेलमा नेपाल जम्मा १ सय १६ रनमा अलआउट भएको थियो । नेपाल पहिलो खेलमा भारत सी सँग १० विकेटले पराजित भएको थियो । भारत ए भने भारत बी सँग ६ विकेटले पराजित भएको थियो । आजको खेलमा प्रशिक्षक विनोद दासले विशाललाई टोलीमा समेट्दै ब्याटिङलाई बलियो बनाउन खोजेका छन् । स्पिनरका रुपमा सागर ढकाल र शेर मल्लसँगै अलराउन्डरद्वय कुशल मल्ल र अरुण ऐरी पनि रहेका कारण ब्याटिङ सुदृढ पार्न खोजिएको हो ।

विशालले मध्यक्रममा ब्याटिङ गर्दै आएका छन् । उनको आगमनसँगै नेपालको तल्लोक्रममा पनि केहि सहयोग पुग्नेछ । ओपनर रित गौतम र लोकेश बम रहनेछन् । त्यसपछि खडकबहादुर बोहोरा, हरिबहादुर चौहान र विशालले मध्यक्रम सम्हाल्नेछन् । दुई अलराउन्डरसंगै तीव्र गतिका बलर आकाश चन्द र प्रतिष जिसी पनि ठूलो सट खेल्ने क्षमता राख्दछन् ।

नेपाली टोली :

रित गौतम(कप्तान), लोकेश बम, खडक बहादुर बोहोरा, हरि बहादुर चौहान, अरुण ऐरी, कुशल मल्ल, प्रतिस जिसी, शेर मल्ल, आकश चन्द, सागर ढकाल र विशाल विक्रम केसी