अर्जुन कार्की, बागलुङ
फ्युचर ब्राइटर माविले प्रथम फ्युचर कप अन्तरकलेज स्तरिय क्रिकेट प्रतियोगिताको उपाधि जितेको छ । अमर आदर्श माविलाई शनिबार भएको फाइनलमा ७ विकेटले हराउँदै फ्युचर ब्राइटरले उपाधि जितेको हो । १ सय ४३ रनको लक्ष्य पछ्याएको फ्युचरले १२.२ ओभरमा ३ विकेट गुमाएर लक्ष्य पुरा गरेको थियो ।

खराब सुरुवात गर्नका वावजुद कप्तान दिपक कुँवरको अर्धशतकको मद्दतमा टोलीले जित हासिल गरेको थियो । दीपकले ३५ बलमा ७ चौका र ५ छक्काको मद्दतमा अविजित ६३ रन बनाए । त्यस्तै सन्देश खड्काले २४ बलमा अविजित ३४ रन र दिनेश अधिकारीले ७ बलमा २१ रन जोडे । अमर आदर्शका लागि अर्जुन गिरी, पारस केसी र सन्दीप कंडेलले समान १ विकेट लिए ।

त्यसअघि टस जितेर पहिले ब्याटिङ गरेको अमर आदर्शले निर्धारित १५ ओभरमा ८ विकेट गुमाएर १ सय ४२ रन बनाएको थियो । टोलकिा लागि अर्जुन गिरीले ३८ बलमा ५१ रन र विरेन्द्र चन्दले १८ बलमा अविजित ४८ रनको योगदान गरेका थिए । फ्युचरका आदेश शर्माले २, सन्देश खड्का, तुल बहादुर थापा र दिनेश अधिकारीले समान १ विकेट लिएका थिए ।

उपाधिसहित फ्युचर ब्राइटरले ४० हजार र अमर आदर्शले २० हजार रुपैयाँ प्राप्त गरे । फ्युचरका कप्तान दिपक कुँवर उत्कृष्ट खेलाडी घोषित भए र उनले ४ हजार रुपैयाँ प्राप्त गरे । त्यस्तै उत्कृष्ट ब्याट्सम्यान अमर आदर्शका रोविन कार्की र उत्कृष्ट बलर फ्युचरका तुल बहादुर थापा चुनिए । दुवैले समान २ हजार रुपैयाँ प्राप्त गरे ।

बागलुङ नगरपालिकाका नगरप्रमुख जनकराज पौडेल, आयोजक फ्युचर स्पोर्टस क्लबका अध्यक्ष बालकृष्ण शर्मालगायतले विजेता, उपजिेता टोलीका खेलाडीलाई पुरस्कृत गरे । कात्तिक २० गतेदेखि संचालन भएको प्रतियोगितामा बागलुङ र पर्वतका १५ टोलीको सहभागिता थियो ।