काठमाडौं (हाम्रो खेलकुद) – राष्ट्रिय क्रिकेट टोलीका सदस्य बंगलादेशमा हुने इमर्जिङ टिम्स एसिया कपको लागि टिकट नपाउँदा तीन दिनमा तीन समूहमा जाने भएका छन् ।

नेपाल क्रिकेट संघ (क्यान) का अध्यक्ष चतुर बहादुर चन्दले यसअघि हिमालय एअरलाइन्समा मंगलबारको लागि टिकट काटेपनि अन्तिम समयमा रद्ध भएपछि टिकट नपाउँदा फरक फरक समूहमा टोली पठाउन लागेको बताएका छन् । सोमबार ९ , मंगलबार ५ र बुधबार ६ सदस्य टोली बंगलादेश जाने छ ।

इमर्जिङ कप कात्तिक २८ देखी मंसिर ७ गते सम्म बंगलादेशको कक्स बजार र ढाकामा चल्ने छ । समुह ‘बी’ मा नेपाल सहित बंगलादेश, हङकङ र भारत छन् । समुह ‘ए’ मा पाकिस्तान, अफगानिस्तान, ओमान र श्रीलंका छन् । नेपाल टोलीले कात्तिक २८ गते भारतसँग खेल्ने छ ।

नेपाल टोलीले कात्तिक ३० गते हङकङ र मंसिर २ गते बंगलादेशसँग खेल्ने छ । सोमबार विकेटकिपर विनोद भण्डारीसँगै, दीपेन्द्र सिंह ऐरी, इशान पाण्डे, करण केसी, ललित नारायण राजवंशी, आरिफ शेख, पवन सरार्फ, सोमपाल कामी र एनालिष्ट रमन शिवाकोटी जाँदै छन् ।

मंगलबार प्रशिक्षक उमेश पटवाल, कप्तान ज्ञानेन्द्र मल्ल, शरद भेषवाकर, सहायक प्रशिक्षक दीपेन्द्र प्रताप सिंह र फिजियो बिक्रम न्यौपाने जाने छन् । बुधबार कुशल भुर्तेल, सन्दीप जोरा, अभिनास बोहोरा, सुसन भारी, रोहित कुमार पौडेल र म्यानेजर प्रशान्त बिक्रम मल्लको टोली जाने क्यानले जनाएको छ ।