एजेन्सी – कप्तान रोहित शर्माले विश्फोटक ब्याटिङ गरेपछि दोस्रो टि ट्वान्टी खेलमा भारतले बंगलादेशलाई ८ विकेटले हराएको छ । योसँगै तीन टि ट्वान्टी खेलको सिरिज १-१ को बराबरी भएको छ ।

जितका लागि १ सय ५४ रनको विजयी लक्ष्य पछ्याएको भारतले १५.४ ओभरमा २ विकेट गुमाउँदै पुरा गर्यो । भारतको जितमा ओपनर तथा कप्तान रोहित शर्माले ८५ रनको विश्फोटक इनिङ खेले । १३ ओभरको दोस्रो बलमा अमीनुल स्लामले मोहम्मद मिथुनबाट क्याच आउट गराउनु अघि रोहितले ४३ बलमा समान ६ चौका र ६ छक्का प्रहार गरे । उनले मात्र २३ बलमा आफ्नो अर्धशतक पूरा गरेका थिए ।

रोहितले पहिलो विकेटका लागि शिखर धवनसँग १०.५ ओभरमा १ सय १८ को साझेदारी गर्दै सहज जित पक्का गरेका थिए । अमीनुललेले बोल्ड आउट गर्नुअघि शिखरले २७ बलमा ४ चौका सहित ३१ रन जोडे । केएल राहुल ८ र श्रेयस ऐर २४ रनमा अविजित रहे । बंगलादेशका अमीनुल स्लामले २ विकेट लिए ।

त्यसअघि राजकोटमा टस हारेर ब्याटिङ थालेको बंगलादेशले निर्धारित २० ओभरमा ६ विकेट गुमाउँदै १ सय ५३ रन बनाएको थियो । पहिलो विकेटका रुपमा ओपनर लिटन दास र मोहम्मद नइमले ७.२ ओभरमा ६० रनको साझेदारी गर्दै राम्रो सुरुवात गरेका थिए । रन आउट हुनुअघि दासले २१ बलमा ४ चौका सहित २९ जोडे । नईम ३६, मुश्फिकुर रहीम ४, सौम्य सरकार २० बलमा २ चौका र १ छक्का सहित ३० रनमा आउट भए ।

कप्तान महमुदुल्लाह २० बलमा ४ चौका सहित ३० रनमा क्याच आउट हुँदा मोसाद्देक हुसेन ७ र अमीनुल स्लाम ५ रनमा अविजित रहे । भारतका स्पिनर युजभेन्द्र चाहलले २ विकेट लिए । खलिल अहमद, दीपक चाहर र वाशिन्टन सुन्दरको नाममा समान १ विकेट रह्यो । बंगलादेशले पहिलो खेलमा भारतलाई ७ विकेटले हराएको थियो । तेस्रो तथा अन्तिम टि ट्वान्टी खेल आगमी आइतबार नागपुरमा हुने छ ।