एजेन्सी – तीन टि ट्वान्टी खेलको सिरिज अन्तर्गत  दोस्रो खेलमा बंगलादेशले भारतलाई १ सय ५४ रनको मध्यम लक्ष्य दिएको छ । राजकोटमा टस हारेर ब्याटिङ थालेको बंगलादेशले निर्धारित २० ओभरमा ६ विकेट गुमाउँदै १ सय ५३ रन बनायो ।

पहिलो विकेटका रुपमा ओपनर लिटन दास र मोहम्मद नइमले ७.२ ओभरमा ६० रनको साझेदारी गर्दै राम्रो सुरुवात दिलाएका थिए । रन आउटको शिकार बन्नु अघि दासले २१ बलमा ४ चौका सहित २९ जोडे । त्यस अघि दासले दुई पटक सम्म जीवनदान पाएका थिए । नईम ३६ रनमा क्याच आउट भए । ११ औं ओभरको तेस्रो बलमा वाशिन्टन सुन्दरले श्रेयस ऐरबाट क्याच आउट गर्नुअघि उनले ३१ बलमा ५ चौका प्रहार गरे ।

मुश्फिकुर रहीम ४ रनमा क्याच आउट भए । सौम्य सरकार २० बलमा २ चौका र १ छक्का सहित ३० रनमा आउट भए । रहिम र सरकार एकै ओभरमा आउट भएपछि बंगलादेशको रनको गति रोकिएको थियो । अफिफ हुसेन ६ रनमा आउट भए । बंगलादेशका कप्तान महमुदुल्लाह २० बलमा ४ चौका सहित ३० रनमा क्याच आउट भए । मोसाद्देक हुसेन ७ र अमीनुल स्लाम ५ रनमा अविजित रहे ।

पहिलो टि ट्वान्टी खेलमा १९ औं ओभरमा अन्तिम चार बलमा लगातार चार चौका खर्चिएका खलिल अहमदले आज दोस्रो ओभरको सुरुवाती तीन बलमा तीन चौका खर्चिए । भारतका स्पिनर युजभेन्द्र चाहलले २ विकेट लिए । खलिल अहमद, दीपक चाहर र वाशिन्टन सुन्दरको नाममा समान १ विकेट रह्यो ।