एजेन्सी – तीन एकदिवसिय खेलको सिरिज अन्तर्गत पहिलो खेलमा वेस्ट इन्डिजले अफगानिस्तानलाई ७ विकेटले हराएको छ ।

जितका लागि १ सय ९५ रनको विजयी लक्ष्य पछ्याएको वेस्ट इन्डिजले ४६.३ ओभरमा ३ विकेट गुमाउँदै पुरा गर्यो । वेस्ट इन्डिजलाई सहज जित दिलाउन रोश्टन चेश र शाई होपले उत्कृष्ट ब्याटिङ गरे । रोश्टन र शाईले तेस्रो विकेटका लागि १ सय ६३ रनको सर्वोउत्कृष्ट साझेदारी गरेपछि वेस्ट इन्डिजले अफगानिस्तानले सहजै हराएको हो ।

४४ ओभरको पाँचौ बलमा मुजिव उर रहमानले बोल्ड आउट गर्नुअघि चेशले १ सय १५ बलमा ११ चौका सहित ९४ रनको योगदान दिए । विकेटकीपर शाई होप १ सय ३३ बलमा ५ चौका सहित ७७ रनमा अविजित रहे । इभिन लुईस ७ र शिम्ररोन हेटमायर ३ रनमा आउट भए । निकोलस पुरन ८ रनमा अविजित रहे । अफगानिस्तानका मुजिव उर रहमानले २ र नविन उल हकले १ विकेट लिए ।

त्यसअघि भारतको लखनउमा टस हारेर ब्याटिङ थालेको अफगानिस्तान ४५.२ ओभरमा अल आउट हुँदै १ सय ९४ रनमा समेटिएको थियो । अफगानिस्तानका रमात शाहले ८० बलमा ६ चौका र १ छक्का सहित सर्वाधिक ६१ रनको योगदान दिए । विकेटकीपर इकराम अली खिलले ५८, अस्गर अफगान ३५, गुलबदीन नाइब १७, हज्रतुल्लाह जजाई ९ रनमा आउट भए । कप्तान राशिद खान गोल्डेन डक आउटको शिकार हुन पुगेका थिए ।

वेस्ट इन्डिजका जोसन होल्डर, रोमारिओ शेरफर्ड र रोश्टनले समान २ विकेट लिए । दोस्रो एक दिवसिय खेल शनिबार हुनेछ ।