काठमाडौं (हाम्रो खेलकुद) – नेपालसँगको तिन दिवसिय प्रथम श्रेणी खेलमा मरिलेबोन क्रिकेट क्लब (एमसीसी) पहिलो दिनको खेल सकिदा बलियो अवस्थामा रहेको छ ।

टस हारेर ब्याटिङ थालेको एमसीसी ८७ ओभरमा ६ विकेट गुमाउँदै ३ सय ११ रनको अवस्थामा पहिलो दिनको खेल सकिएको छ । खराब प्रकाश (ब्याड लाइट) को कारण ९ ओभर बाँकी रहँदा पहिलो दिनको खेल सकिएको हो ।

एमसीसीका यासिर अराफात ३५ र एलेक्स थोम्पसन २२ रनमा अविजित छन् । नवौं ओभरको पहिलो बलमा सोमपाल कामीले ओपनर बिली गोडलम्यानलाई १० रनमा ललित नारायण राजवंशीबाट उत्कृष्ट क्याच गराउँदै पेभिलिएन फर्काए ।

३५ ओभरको दोस्रो बलमा सोमपालनै अर्का ओपनर विल रोड्सलाई ७३ रनमा बोल्ड आउट गरे । रोड्सले १ सय १० बलमा १२ चौका प्रहार गरे । रोड्सले ब्यक्तिगत १४ रनमा जीनवदान पाएका थिए । विनोद भण्डारीले सहज क्याच छाड्न पुगेका थिए । वेस्ट्ली र रोड्स दोस्रो विकेटका लागि ९४ रनको साझेदारी गरे ।

शरद भेषवकरले ४३ ओभरको दोस्रो बलमा इंग्ल्यान्डबाट टेष्ट खेली सकेका युवा खेलाडी टम वेस्ट्लीलाई ३९ रनमा एलबी डब्लू आउट गरे । उनले १ सय २ बलको सामना गर्दै ४ चौका प्रहार गरे ।

शरदलेनै माईल्स हामान्डलाई ५२ रनमा बोल्ड आउट गरे । माईल्सले ६ चौका र १ छक्का प्रहार गरे । सन्दीपले ६२ ओभरको चौथो बलमा अलराउन्डर एड योङलाई १७ रनमा सिलिपमा कप्तान ज्ञानेन्द्र मल्लबाट क्याच आउट गराउँदै प्रथम श्रेणीमा ब्यक्तिगत पहिलो सफलता हात पारे ।

औं ७२ ओभरको अन्तिम बलमा सन्दीपले विल भानडरसपारलाई ५३ एलबी डब्लू आउट गर्दै पेभिलिएनको बाटो देखाए । उनले ९६ बलमा ८ चौका र १ छक्का प्रहार गरे । नेपालका लागि तीब्र गतिका बलर सोमपाल कामी, स्पिनर सन्दीप लामिछाने र शरद भेषवकरले समान २ विकेट लिए ।