काठमाडौं (हाम्रो खेलकुद) – अष्ट्रेलियामा जारी रिचा स्मृति क्रिकेट प्रतियोगिताको फाइनलमा रोयल राइनोज क्रिकेट क्लब र सगरमाथा क्रिकेट क्लब भिड्ने भएका छन् ।

आइतबार भएको सेमिफाइनलमा सगरमाथा क्रिकेट क्लबले हिमालयन क्रिकेट क्लबलाई ४ विकेटले तथा रोयल राइनोज क्रिकेट क्बलले नार्रे किंग्सलाई ५ विकेटले हराउँदै फाइनलमा पुगेका हुन् ।

पहिलो सेमिफाइनलमा टस जितेर नार्रेले ब्याटिङ गर्दै निर्धारित २० ओभरमा ५ विकेटको क्षतिमा १ सय ३८ रन बनाएको थियो । नार्रेका आकाशले ३९, अनुपले २३ र किरनले २० रन जोडे । निरजले २,भिस्म, निराजन र उत्सवले समान १ विकेट लिए ।

१ सय ३९ रनको लक्ष्य रोयलले १८.५ ओभरमा ५ विकेट गुमाउँदै पुरा गर्यो । उसका जितमा मोहनले समान ३ चौका र छक्का सहित ५६, चन्द ४२ र सन्जोगले १२ रन जोडे । नार्रेका कृष्णले २ र किशोरले १ विकेट लिए ।

त्यस्तै सेमिफाइनलमा सगरमाथाविरुद्ध टस जितेर हिमालयनले ब्याटिङ गर्दै २० ओभरमा ७ विकेटको क्षतिमा १ सय २५ रन बनाएको थियो । सन्दीपले ३१, तानाम अविजित ३६ र सुनिलले २० रन जोडे । सगरमाथाका अभिनाषले ३, सुनित र राजकुमारले समान १ विकेट लिए । १ सय २६ रनको लक्ष्य ६ विकेटको क्षतिमा पुरा गर्यो । सगरमाथाका विकेशले ४३, राजकुमारले २७ र दिपनले १३ रन जोडे । हिमालयनका किरणले २, रोशन र सरोजले समान १ विकेट लिए ।

फाइनल रोयल राइनोज र सगरमाथा क्रिकेट क्बलबीच आगमी मंसिर १ अर्थात नोभेम्बर १७ मा हुने आयोजकले जनाएको छ । प्रतियोगिता क्यानका पूर्व उपाध्यक्ष नरेश श्रेष्ठकी छोरी रिचा श्रेष्ठको स्मृतिमा आयोजना गरिएको हो ‌। उनको केहि महिनाअघि निधन भएको थियो ।