एजेन्सी – नेपालले बंगलादेशमा हुने इमर्जिङ टिम एसिया कप खेल्न पाउने भएको छ । यूएईले अन्तिम समयमा आन्तरिक कारण आफ्नो नाम फिर्ता लिएपछि एसियन क्रिकेट काउन्सिल (एसीसी) ले नेपाललाई मौका दिएको हो ।

इमर्जिङ टिम एसिया कप कात्तिक २८ देखी मंसिर ७ (नोभेम्बर १४–२३) सम्म बंगलादेशमा हुने छ । समुह ए मा श्रीलंका, पाकिस्तान, अफगानिस्तान र ओमान छन् । समुह बी मा नेपाल, भारत, बंगलादेश र हङकङ रहेका छन् । नेपालले पहिलो खेल भारतसँग कात्तिक २८ मा खेल्ने छ । नेपालले हङकङसँग कात्तिक ३० र मंसिर २ मा बंगलादेशसँग खेल्ने छ ।

उपाधिको दावेदार भारतले आफ्नो टोली घोषणा गरिसकेको छ । भारतीय टोलीमा तीव्र गतिका बलर कमलेश नगरकोटी मुख्य हतियारका रुपमा रहेका छन् ।

भारत साविक उप विजेता

भारत गत वर्ष इमर्जिङ एसिया कपको उप विजेता टोली हो । गत वर्ष श्रीलंका र पाकिस्तानमा संयुक्त रुपमा भएको इमर्जिङ एसिया कपमा भारत फाइनलमा श्रीलंकासँग ३ रनले पराजित भएको थियो । सेमिफाइनलमा पाकिस्तानलाई ७ विकेटले हराएको थियो । समुह चरणमा भारतले अफगानिस्तानलाई ७४ रन,ओमानलाई ६ विकेट र श्रीलंकालाई ४ विकेटले पराजित गरेको थियो ।

कमलेश प्रमुख हतियार

इमर्जिङ एसिया कपको नेतृत्व बीआर शरथले गर्ने छन् । भारतीय टोलीमा विजय हजारे ट्रफी, आईपीएल, यू१९ विश्वकप, रणजी ट्रफीको अनुभव बटुलेका खेलाडी छन् । तीव्र गतिका बलर कमलेश नगरकोटी पनि प्रमुख हतियार हुन् । नगरकोटीले भारतबाट यू१९ विश्वकप, रणजी ट्रर्फिको लगातको घरेलु प्रतियोगिताको अनुभव बटुलीसकेका छन् ।

कप्तान तथा विकेटकीपर शरथले ६ प्रथम श्रेणी, १२ लिष्ट ए र १३ टि ट्वान्टी एस खेलेका छन् । त्यस्तै गत वर्ष यू१९ विश्वकप खेलेका आर्यन जुयाल, अर्शदीप सिंह सँगै गत वर्ष इमर्जिङ टिम खेलेका सिद्धार्थ देसाई लयातका खेलाडी छन् । अर्शदीप सिंहले गत संस्करणको आईपीएलमा किंग्स इलाभेन पञ्जावबाट खेलेका थिए ।

भारतीय टिम :

विनायक गुप्ता, अर्यान जुयाल, बीआर शरथ (कप्तान तथा विकेटकीपर) चिन्मय सुतार, यश राठोड, आरमान जफार, सानविर सिंह, कमलेश नगरकोटी, ह्थिक शोकिन, सिद्धार्थ देसाई, अर्शदीप सिंह, एसआर दुबे, कुमार सुरज, पी रेखाडे र कुलदीप यादव ।

भारतले पहिलो खेल कात्तिक २८ मा नेपालसँग खेल्ने छ । त्यस्तै कात्तिक ३० मा बंगलादेश र मंसिर २ मा हङकङ खेल्ने छ । दुबै समुहका शीर्ष दुई दुई टोलीले सेमिफाइनलमा स्थान बनाउने छन् । मंसिर ४ र ५ मा सेमिफाइनल हुने छ । फाइनल मंसिर ७ मा हुने कार्यतालिका रहेको छ ।