एजेन्सी – स्कटल्यान्ड अर्को वर्ष अष्ट्रेलियामा हुने टि ट्वान्टी विश्वकपको लागि छनोट भएको छ । वुधबार घरेलु टोली युएईलाई ९० रनले हराउँदै चौथो पटक टि ट्वान्टी विश्वकपमा पुगेको हो । स्कटल्यान्डले यसअघि सन् २००७, २००९ र २०१६ मा टि२० विश्वकप खेलेको थियो ।

१ सय ९९ सयको रनको लक्ष्य पछ्याएको यूएई १८.३ मा अल आउट हुँदै १ सय ८ रनमा समेटिएपछि विश्वकप यात्राबाट बाहिरिएको हो । यूएईका रमिज शहजादले ३४,डी शिल्भाले १९, मोहम्मद उस्मानले २० रन जोड्न बाहेक अन्य कुनै पनि ब्याट्सम्यानले दोहोरो अंकमा रन छुन सकेनन् । स्क्टल्यान्डका मार्क वाट्ट र शफयान शरिफले समान ३ विकेट लिए ।

त्यस अघि टस जितेर ब्याटिङ थालेको स्कटल्यान्डले २० ओभरमा ६ विकेट गुमाउँदै १ सय ९८ रन बनाएको थियो । ओपनर जर्ज मुन्शेले ४३ बलमा २ चौका र ५ छक्का सहित सर्वाधिक ६५ रनको योगदान दिए । कप्तान काइल कोट्जर ३४,रिची बेरिन्गटन ४८ रन जोडे । रोहन मुस्तफाले २,जुनैद सिद्दीक अहमख राजा र जहुर खानले समान १ विकेट लिए ।

यूएई पहिलो प्ले अफमा नेदरल्यान्ड्ससँग ८ विकेटले पराजित भएको थियो । यो सँगै यूएईको विश्वकप खेल्ने सपना समाप्त भएको छ । पप्पुवा न्युगिनी समुह ए र आयरल्यान्ड समुह बी बाट शीर्ष स्थानमा रहँदै विश्वकपमा छनोट भएका थिए ।

नेदरल्यान्ड र नामिवियाले पनि विश्वकपमा स्थान बनाएका छन् । ओमानले आज राती समुह बी को चौथो स्थानमा रहँदै प्ले अफमा पुगेको हङकङसँग प्रतिस्पर्धा गर्ने छ । विजेता टोली विश्वकपमा पुग्ने छ । दोस्रो प्ले अफमा ओमान नामिबियासँग ५४ रनले पराजित भएको थियो ।