एजेन्सी – नामिबिया पहिलो पटक टि ट्वान्टी विश्वकपमा छनोट भएको छ । यूएईमा जारी आईसीसी टि ट्वान्टी विश्वकप छनोटको दोस्रो प्ले अफमा ओमानलाई ५४ रनले हराउँदै आगमी वर्ष अष्ट्रेलियामा हुने टि ट्वान्टी विश्वकपमा प्रवेश गरेको हो ।

मंगलबार जितका लागि १ सय ६२ रनको विजयी लक्ष्य पछ्याएको ओमान १९.१ ओभरमा अल आउट भएपछि नामिवियाले ऐतिहासिक सफलता हात पारेको हो ।ओमानका लागि ओपनर खवर अलीले २५ बलमा ५ चौका र २ छक्का सहित सर्वाधिक ४१ रनको योगदान दिए । अर्का ओपनर जितेन्द्र सिंह शून्यमा आउट हुँदा,अकीव इलियास १८,अमिर कलिम १३ र सुरज कुमार ६ रनमा आउट भए । नामिविया कप्तान गेरहार्ड इरास्मसल सर्वाधिक ३,जेजे स्मिथले २ र बर्नार्ड शोल्ट्ज ३ विकेट लिए ।

त्यस अघि टस जितेर ब्याटिङ थालेको नामिवियाले २० ओभरमा ७ विकेट गुमाउँदै १ सय ६१ रन बनाएको थियो । सुस्त सुरुवात गरेको नामिवियालाई तल्लोक्रमका जेजे स्मिथले २५ बलमा ३ चौका र ५ छक्का सहित ५९ रनको आक्रमक इनिङ खेल्दै बलियो योगफलमा पुर्याए । क्रेग विलियम्स ४५ र निको डविन २१ रन जोडे ।

ओमानका बिलाल खानले ४ ओभरमा १ मेडन सहित १९ रन खर्चेर ४ विकेट लिए । ओमान समुह बी मा ६ खेलमा ४ मा जित र २ मा हारका साथ दोस्रो स्थानमा रहँदै प्ले अफ खेलेको थियो । नामिविया समुह ए बाट ६ खेलमा ४ मा जित र २ मा हारका साथ तेस्रो स्थानमा रहँदै प्ले अफ खेलेको थियो । विश्वकपमा स्थान बनाउन ओमानले अन्तिम मौका पाउने छ । ओमानले आज राती समुह बी को चौथो स्थानमा रहँदै प्ले अफमा पुगेको हङकङसँग प्रतिस्पर्धा गर्ने छ । विजेता टोली विश्वकपमा पुग्ने छ ।

आज यूएई र स्कटल्यान्डबीच प्लेअफमा प्रतिस्पर्धा हुँदै छ । विजेता टोली सोझैं विश्वकपमा पुग्ने छ । यूएई पहिलो प्ले अफमा नेदरल्यान्ड्ससँग ८ विकेटले पराजित हुँदै अन्तिम मौका पाएको हो । स्कटल्यान्ड भने समुह ए को चौथो स्थानमा रहँदै प्ले अफ खेलेको हो ।

पप्पुवा न्युगिनी समुह ए बाट शीर्ष स्थानमा रहँदै पहिलो पटक टी ट्वान्टी विश्वकपमा पुगिसकेको छ । त्यस्तै समुह बी बाट आयरल्यान्ड शीर्ष स्थानमा रहँदै विश्वकपमा छनोट भएको छ । नेदरल्यान्डले प्ले अफमा यूएईलाई हराउँदै चौथो पटक विश्वकपमा पुगि सकेको छ ।