एजेन्सी – नेदरल्यान्ड्स अर्को वर्ष अष्ट्रेलियामा हुने टि ट्वान्टी विश्वकपको लागि छनोट भएको छ । पहिलो क्वालिफायरमा यूएईलाई ८ विकेटले हराउँदै नेदरल्यान्डले विश्वकपमा आफ्नो स्थान पक्का गरेको हो ।

नेदरल्यान्ड चौथो पटक टि ट्वान्टी विश्वकपमा पुगेको हो । यस अघि नेदरल्यान्ड सन् २००९,२०१४ र २०१६ मा टि ट्वान्टी विश्वकप खेलेको थियो । मंगलबार जितका लागि ८१ रनको समान्य लक्ष्य नेदरल्यान्ड्सले १५.१ ओभरमा २ विकेट गुमाउँदै पुरा गर्यो । नेदरल्यान्ड्सको जितमा ओपनर बेन कपुर ५३ बलमा ३ चौका सहित ४१ रनमा अविजित रहे । कोलिन एकरमान १८ रनमा आउट हुँदा रायन टेन ११ रनमा अविजित रहे । यूएईका रोहन मुस्तफा र जहुर खान समान १ विकेट लिए ।

त्यसअघि टस जितेर ब्याटिङ थालेको यूएईले निर्धारित २० ओभरमा ९ विकेट गुमाउँदै ८० रन बनाएको थियो । उसका अहिद अहमदले १९, मोहम्मद बूटा १६, अहमिद राजा २२ र सुल्तान अहमदले ११ रन बनाउन बाहेक अन्य कसैले पनि राम्रो प्रर्दशन गर्न सकेनन् । शीर्षक्रमका रोहन मुस्तफा १, जवार फरिद ५ तथा रमिज शहजाद, मोहम्मद उस्मान र डी शिल्भा डक आउट भए ।

नेदरल्यान्ड्सका ब्रेन्डन ग्लोेभरले ४ ओभरमा १२ रन खर्चेर ४ विकेट लिए । पल भान मार्करेन र टिमम भान डर जुर्टेनले समान २ विकेट लिए । समुह ए बाट पप्पुवा न्युगिनी र बी बाट आयरल्यान्ड शीर्ष स्थानमा रहँदै सोझै विश्वकपमा पुगि सकेका छन् ।

यूएईले विश्वकपमा स्थान बनाउन अझै स्कटल्यान्डसँग खेल्न पाउने छ । आज नै नामिबिया र ओमान भिड्दै छन् जसको विजेता विश्वकपमा पुग्ने छ । हङकङले विश्वकपमा स्थान बनाउन नामिबिया र ओमानबीचको पराजित टोलीसँग प्रतिस्पर्धा गर्नेछ ।