एजेन्सी – पप्पुवा न्युगिनी पहिलो पटक टि२० विश्वकपको लागि छनोट भएको छ । यूएईमा जारी आईसीसी टि ट्वान्टी ग्लोबल विश्वकप छनोटमा समुह ए बाट शीर्ष स्थानमा रहँदै आगमी वर्ष अष्ट्रेलियामा हुने टि ट्वान्टी विश्वकपको लागि स्थान बनाएको हो ।

पप्पुवा न्युगिनीले ६ खेलमा ५ मा जित र १ मा हारका साथ शीर्ष स्थानमा रहँदै विश्वकपमा पहिलो पटक स्थान बनाएको हो । पप्पुवा न्युगिनीले आजनै केन्यालाई ४५ रनले पराजित गरेको थियो । तर विश्वकपमा स्थान बनाउन नेदरल्यान्ड र स्कटल्यान्डको खेल पर्खनु परेको थियो ।

स्कटल्यान्डले प्रस्तुत गरेको १ सय ३१ रनको लक्ष्य नेदरल्यान्डले १२.३ ओभरमा पुरा गरेको भए शीर्ष स्थान रहँदै सोझैं विश्वकपमा पुग्थ्यो । नेदरल्यान्डले उक्त लक्ष्य १२.३ ओभरमा पुरा गर्न नसकेपछि पप्पुवा न्युगिनी छनोट भएको हो ।

पप्पुवा न्युगिनीले पहिलो खेलमा बर्मुडालाई १० विकेटले हराएको थियो । दोस्रो खेलमा नामिबियालाई ८१ रनले हरायो । स्कटल्यान्डसँग भने ४ रनले पराजित हुन पुग्यो । चौथो खेलमा नेदरल्यान्डलाई ५ विकेटले हराएपछि पप्पुवा न्युगिनीको विश्वकप सहज बनेको थियो । पाँचौ खेलमा पप्पुवा न्युगिनीले सिंगापुरलाई ४३ रनले हराएको थियो ।

समुह ए बाट पप्पुवा न्युगिनी ६ खेलमा ५ मा जित र १ मा हारका साथ १० अंक जोड्दै शीर्ष स्थानमा रहँदै विश्वकपमा पुगेको हो । ६ खेलमा ५ मा जित र १ मा हारका साथ नेदरल्यान्डको पनि १० अंकनै भएपनि नेट रन रेटका आधारमा दोस्रो स्थानमा रह्यो । नामिबिया ६ खेलमा ४ मा जित र २ मा हारका साथ ८ अंक जोड्दै तेस्रो स्थानमा रह्यो । स्कटल्यान्डले ६ खेलमा समान ३ मा जित र हारका साथ चौथो स्थानमा रह्यो । नेदरल्यान्ड,नामिबिया र स्कटल्यान्ड प्ले अफमा पुगेका छन् ।

६ खेलमा २ मा जित र ४ मा हारका साथ केन्या पाँचौ स्थानमा रहेर बाहिरियो । सिंगापुरले पनि ६ खेलमा ४ मा हार र २ मा जितका साथ छैटौ स्थानमा रहँदै बाहिरिनु पर्यो । पुछारमा रहेर बाहिरिएको बर्मुडाले ६ खेलमानै पराजित भयो ।