एजेन्सी – श्रीलंकाले अष्ट्रेलियासँगको पहिलो टि ट्वान्टी खेलमा लज्जास्पद हार बेहोरेको छ । अष्ट्रेलियाले कीर्तिमानी जित हात पार्नेक्रममा श्रीलंकालाई १ सय ३४ रनको फराकिलो अन्तरले पराजित गरेको हो । यो अष्ट्रेलियाले रन अन्तरले टि२० आईमा हात पारेको सर्वाधिक ठूलो जित हो ।

जितका लागि २ सय ३४ रनको विशाल लक्ष्य पछ्याएको श्रीलंका २० ओभरमा ९ विकेट गुमाउँदै ९९ रन मात्र बनाउन सक्यो । श्रीलंका दसुन सनका १७, अोषदा फर्नान्डो १३,कुशल परेरा १६ र दनुष्का गुणतिलक ११,नुवान प्रदीप ८ र कप्तान लासिथा मलिङ्गा १३ रन जोड्न बाहेक अन्य कुनै पनि ब्याट्सम्यानले राम्रो प्रर्दशन गर्न सकेनन् ।

अष्ट्रेलियाको सहज जितमा स्पिनर एडम जम्पाले ४ ओभरमा १४ रन खर्चेर ३ विकेट लिए । तीब्र गतिका बलर मिचेल स्टार्क र प्याट कमिन्सको नाममा समान २ विकेट रह्यो । एस्टोन एगरले १ विकेट हात पारे ।

त्यसअघि टस हारेर ब्याटिङ थालेको अष्ट्रेलियाले डेविड वार्नरको शतकमा २० ओभरमा २ विकेटको क्षतिमा २ सय ३३ रन बनाएको थियो । ओपनर डेविड वार्नरले अविजित शतकीय योगदान दिए । वार्नरको आज ३३ औं जन्मदिन पनि हो । अन्तिम ओभरको अन्तिम बलमा १ रन बटुल्दै वार्नरले टि २० आई करिअरमा आफ्नो पहिलो शतक पुरा गरेका थिए । वार्नर ५६ बलमा १० चौका र ४ छक्का सहित एक सय रनमा अविजित रहे ।

पहिलो विकेटका लागि वार्नर र कप्तान आरोन फिन्चले १०.५ ओभरमा १ सय २२ रनको शतकीय साझेदारी गरेका थिए । ठूलो सटको धुनमा कुशल मेन्डिसबाट क्याच आउट हुनुअघि फिन्च ३६ बलमा ८ चौका र ३ छक्का सहित ६४ रन जोडे ।

ग्लेन म्याक्सवेलले विश्फोटक ब्याटिङ गर्दै २८ बलमा ७ चौका र ३ छक्का सहित ६२ रनको योगदान दिए । श्रीलंकाका लागि दसुन सनका र लक्सान सनदकनको नाममा समान १ विकेट रह्यो । योसँगै तीन टि ट्वान्टी सिरिजमा अष्टेलियाले १-० को अग्रता लिएको छ । दोस्रो खेल आगमी बुधबार हुने छ ।