काठमाडौं (हाम्रो खेलकुद) – क्याट क्विन्स काठमाडौंकी कप्तान रुविना क्षेत्री बेलवासी वुमन्स च्याम्पियन्स लिग (डब्लूसिएल) सर्वोत्कृष्ट खेलाडी घोषित भएकी छिन् । योसँगै रुविनाले टिभिएस १ सय २५ सिसिको स्कुटर सहित ५० हजार प्राप्त गरिन् ।

काठमाडौंकी कप्तानी रुविना क्षेत्री बेलवासीले प्रतियोगिता भर ६ खेलमा २ अर्ध शतक सहित कुल २ सय १४ रन बनाउनुको साथै ५ विकेट लिइन् । रुविनाले पोखरा पल्टनविरुद्ध ८३ रनमा अविजित इनिंग खेलेकी थिइन् । विराटनगर टाइटन्सविरुद्ध रुविना ३५ रनमा अविजित रहँदै १ विकेट लिएकी थिइन् ।

फाल्कोन्सविरुद्ध रुविनाले ५९ रनमा अविजित रहेकी थिइन् । क्वालिफायरमा विराटनगर टाइटन्सविरुद्ध ३४ रनमा अविजित रहनुको साथै ४ ओभरमा १ मेडन सहित ४ रन खर्चेर ४ विकेट लिएकी थिइन् । फाइनलमा भने रुविना २ रनमा आउट हुन पुगिन् ।

चितवनकी मध्यगतिकी बलर कविता गौतम प्रतियोगिताको सर्वोउत्कृष्ट बलर घोषित भइन् । उनले ५ खेलमा १० विकेट लिएकी थिइन् । कविताले २५ हजार प्राप्त गरिन् । त्यस्तै चितवनकी ओपनर काजल श्रेष्ठ प्रतियोगिताको उत्कृष्ट ब्याट्सम्यान घोषित भइन् । उनले ४ खेलमा १ सय ३४ रन बनाएकी थिइन् । उनले पनि २५ हजार प्राप्त गरिन् ।

त्यस्तै काठमाडौंकी तीब्र गतिकी बलर इश्वरी विष्ट उदयमान खेलाडी घोषित हुन १५ हजार प्राप्त गरिन् । उनले ६ खेलमा ६ विकेट लिनुको साथै २४ रन जोडिन् ।

बिहीबार फाइनल खेलमा क्याट क्विन्स काठमाडौंलाई ४५ रनले पराजित गर्दै चितवनले उपाधि जितेको । विजेता चितवनले ७ लाख र उप विजेता काठमाडौंले ३ लाख पायो । १ सय १३ रनको लक्ष्य पछ्याएको काठमाडौं २० ओभरमा अल आउट हुँदै ६७ रनमा समेटियो ।