एजेन्सी – भारतीय राष्ट्रिय क्रिकेट टोलीका पूर्वकप्तान सौरभ गांगुलीले भारत क्रिकेट कन्ट्रोल बोर्ड (बीसीसीआई) को अध्यक्ष पदको कार्यभार सम्हालेका छन् ।

अध्यक्ष पदमा सर्वसम्मत चुनिएका गांगुलीले बुधबार देखी बीसीसीआईको कार्यभार औपचारिक रुपमा सम्हालेका हुन् । गांगुली बीसीसीआईका ३९ औं अध्यक्ष हुन् । गांगुलीले भारतीय क्रिकेटमा सर्वाधिक सफल कप्तान मध्यका एक विकेटकीपर महेन्द्र सिंह धोनीको बारे बोलेका छन् । यसले धोनीलाई राष्ट्रिय टोलीमा फर्कन केहि सहज हुने संकेत देखिएको छ ।

‘धोनीले आफ्नो फैसला आफैं गर्नेछन् । म पनि टिममा बाहिर रहेको बेला पुन फर्किएको थिएँ, च्याम्पियनले यति छिटो छोड्दैनन् । उनको दिमागमा के चलिरहेको छ मलाई थाहा छैन’,गांगुलीले भने, ‘धोनी महान खेलाडी मध्यका एक हुन् । जबसम्म म हुने छु, सबको सम्मान गर्ने छु । यसमा कुनै परिवर्तन आउने छैन । सन्न्यासको बारे धोनीलाई आफैं सोच्न दिनुपर्छ ।’

गांगुली बंगाल क्रिकेट संघको अध्यक्ष समेत हुन् । गत वर्षको इन्डियन प्रिमियर लिग(आईपीएल) मा नेपाली लेगस्पिनर सन्दीप लामिछाने सम्मिलित दिल्ली क्यापिटल्समा सहाक प्रशिक्षको रुपमा समेत काम गरेका थिए । गांगुलीले वान डे मा सन् १९९२ मा वेस्ट इन्डिजविरुद्ध डेब्यू गरेका थिए । त्यस्तै टेष्टमा इंग्ल्यान्डविरुद्ध सन् १९९६ मा डेब्यू गरेका थिए । गांगुलीले १ सय १३ टेष्ट खेलमा १६ शतक सहित कुल ७ हजार २ सय १२ रन बनाएका छन् ।

त्यस्तै उनले ३ सय ११ ओडीआईमा २२ शतक सहित ११ हजार ३ सय ६३ रन बनाएका छन् । सन् १९९९ देखी २००५ सम्म ओडीआईको कप्तान बन्दा भारत १ सय ४६ खेलमा ७६ मा जित र ६५ मा पराजित भएको थियो । त्यस्तै २००० देखी २००५ सम्म टेष्टको कप्तान बनेका उनले ४९ टेष्टमा २१ मा जित र १३ मा पराजितको सामाना गर्नु परेको थियो ।

धोनी एकदिवसिय विश्वकप यता भारतीय टिममा छैनन् । धोनी भारतलाई विश्वकप दिलाउँदै सन्न्यास लिने सोचमा छन् । किकेट जानकारका अनुसार धोनीले आगमी वर्ष अष्ट्रेलिया हुने टि२० विश्वकप सम्म खेल्ने इच्छा राखेको बुझिएको छ ।