एजेन्सी – दक्षिण अफ्रिकासँगको तेस्रो तथा अन्तिम टेष्टमा घरेलु टोली भारत फराकिलो जित नजिक पुगेको छ ।

तेस्रो दिनको खेल सकिँदा फलोअनमा परेको दक्षिण अफ्रिका ४६ ओभरमा १३२-८ को कमजोर अवस्था हुँदै हार नजिक छ । दोस्रो इनिङमा ओपनर क्विन्टन डी कक ५,कप्तान फाफ डु प्लेसिस ४,तेम्बा बुभवा डक,जर्ज लिन्डे २७ र डेन २३,कागिसो रबाडा १२ रनमा आउट भइ सकेका छन् । देयूनिस डी ब्रुइन ३० रनमा अविजित छन् । भारतका लागि मोहम्मद शामीले ३ र उमेश यादवले २ विकेट लिए ।

दक्षिण अफ्रिका पहिलो इनिङमा ५६.२ ओभरमा १ सय ६२ रनमा अल आउट भएपछि फलोअनमा परेको थियो । दक्षिण अफ्रिका जुबैर हमजा ६२,तेम्वा बभुमा ३२ र जर्ज लिन्डेले ३७ रन जोड्न बाहेक अन्य कुनै पनि ब्याट्सम्यानले दोहोरो अंकमा रन छुन सकेनन् । भारतका शहबाज नदिम रविन्द्र जडेजा समान २ विकेट लिए । मोहम्मद शामीको नाममा ३ विकेट रह्यो ।

भारतले ११६.३ ओभरमा ४९७-९ को अवस्थामा पहिलो इनिङ समाप्तीको घोषणा गरेको थियो । ओपनर रोहित शर्माले २ सय १२ रन जोडे । रोहितको टेष्टमा यो पहिलो दोहोरो शतक समेत हो । रोहितले २ सय ५५ बलमा २८ चौका र ६ छक्का प्रहार गरेका थिए।

अजिंक्या रहाणेले आफ्नो ११ औं टेष्ट शतक पुरा गर्ने क्रममा १ सय १५ रन जोडे। रोहित र रहाणेले चौथो विकेटका लागि २ सय ६७ रनको साझेदारी गरेका थिए । तल्लोक्रममा रविन्द्र जडेजाले ५१ र उमेश यादवले ३१ रन जोडे । उमेशले १० बलमा ५ छक्का प्रहार गरेका थिए । दक्षिण अफ्रिका कागिसो रबाडाले ३ र जर्ज लिन्डेले ४ विकेट लिए । तीन टेष्ट सिरिज भारतले २-० ले आफ्नो पक्ष्यमा पारी सेकेको छ ।