काठमाडौं (हाम्रो खेलकुद) – वुमन्स च्याम्पियन्स लिग टि२० क्रिकेट प्रतियोगिता अन्तर्गत आइतबारको पहिलो खेलमा ललितपुर फाल्कोन्सले क्याट क्विन्स काठमाडौंलाई १ सय ७ रनको लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ गर्ने निर्णय लिएको ललितपुरले निर्धारित २० ओभरमा ५ विकेट गुमाउँदै १ सय ६ रन बनायो । लतिपुरका लागि ओपनर रोशनी बोहराले ५० बलमा २ चौका सहित २९ रनमा अविजित रहिन् । कृती शेन ६ रनमा अविजित रहिन् ।

पाँचौ ओभरको पाँचौ बलमा ओपनर गीता गोशाई १३ रनमा रन आउट हुन पुगिन् । नवौं ओभरको चौथो बलमा ममता चौधरी पनि १५ रनमा रन आउट हुन पुगिन् । १४ ओभरको अन्तिम बलमा सरस्वती कुमारी चौधरीले कप्तान नेरी थापालाई आफैं क्याच गर्दै २२ रनमा पेभिलिएन फर्काइन् । उनले १९ बलमा ४ चौका प्रहार गरिन् । अन्तिम ओभरको पहिलो बलमा करुणा भण्डारीलाई इश्वरी विष्ट ८ रनमा बोल्ड आउछ गरिन् ।

काठमाडौंकी इश्वरी विष्टले ४ ओभरमा ३० रन खर्चेर २ विकेट लिइन् । सरस्वती कुमारी चौधरीले १ विकेट लिइन् । यस खेलमा काठमाडौं विजयी भए क्वालिफायरमा पुग्ने छ । काठमाडौं पराजित भए क्वालिफायरको लागि अन्य खेलको नतिजा पर्खनु पर्ने हुन्छ ।

यता ललितपुर पराजित भए समुह चरणबाटै बाहिरिने छ । ललितपुर विजयी भएमा अर्को चरणको झिनो आसा संभावना कायमै रहने छ ।