एजेन्सी – यूएईमा आज देखी सुरु भएको आईसीसी टि ट्वान्टी विश्वकप छनोट प्रतियोगितामा आयरल्यान्ड र नेदरल्यान्डले विजयी सुरुवात गरेका छन् ।

विश्वकप छनोटको दोस्रो खेलमा आयरल्यान्डले हङकङलाई ८ विकेटले पराजित गर्दै विजयी सुरुवात गरेको हो । १ सय ५४ रनको विजयी लक्ष्य पछ्याएको आयरल्यान्डले १७.२ ओभरमा २ विकेट गुमाउँदै पुरा गर्यो । आयरल्यान्डको जितमा एन्डयू बलबर्नीले ५३ बलमा ८ चौका सहित ७० रनमा अविजित रहे । ओपनर पल स्टर्लिङले ३६ बलमा ८ चौका र २ छक्का सहित ६२ रनको योगदान दिदै प्लेयर अफ द म्याच घोषित बने ।

त्यस अघि टस जितेर पहिला ब्याटिङ थालेको हङकङले २० ओभरमा ५ विकेट गुमाउँदै १ सय ५३ रन बनाएको थियो । उसका लागि किंचित शाहले ५४ बलमा ६ चौका र २ छक्का सहित ७९ रनको योगदान दिए । अजाज खान १६, हारुन अर्शद २० र सिमनदीप सिंहले १४ रन जोडे । आयरल्यान्डका लागि मार्क आदिर २, ग्रेथ डेनली र डेविड डेनलीको नाममा समान १ विकेट रह्यो ।

त्यस्तै अर्को खेलमा नेदरल्यान्डले केन्यालाई ३० रनले पराजित गर्यो । १ सय ६७ रनको विजयी लक्ष्य पछ्याएको केन्या निर्धारित २० ओभरमा ८ विकेट गुमाउँदै १ सय ३६ रन मात्र बनाउन सक्यो । उसका कोलिन्स ओबुयाले ४० बलमा ७ चौका र २ छक्का सहित सर्वाधिक ६३ रनको योगदान दिए । राकीप पटेल २६ रन जोड्दा अन्यले राम्रो प्रर्दशन गर्न सकेनन् ।

नेदरल्यान्डको जितमा पल भान मेर्किरेनले ४ ओभरमा २७ रन खर्चेर ३ विकेट लिए । फ्रेद क्यालासेन२,टिम भान डेर,ब्रान्डन गोभर र रोलेफ भान डर मर्वेले समान १ विकेट लिए ।

त्यस अघि टस जितेर पहिला ब्याटिङ थालेको नेदरल्यान्डले निर्धारित २० ओभरमा ४ विकेट गुमाउँदै १ सय ६६ रन बनाएको थियो । म्याक्स ओडोअडले ४६ बलमा ४ चौका र १ छक्का सहित ५३ रन जोडे । टोबिसा भिस्सी २०,बेन कपुर ३६,रोलेल भान डेर मर्व २१ र पिटर सेलार २४ रनमा अविजित रहे । केन्याका कोलिन्स ओबुयाले २निल्सन ओधिम्बो र शेमनोग्चेको नाममा १ विकेट रह्यो ।

आजको पहिलो खेलमा सिंगापुरले स्कटल्यान्डलाई २ विकेटले पराजित गरेको थियो । नोभेम्बर २ सम्म चल्ने प्रतियोेगितामा कुल १४ टोलीको सहभागिता छ । शीर्ष ६ टोली आगमी वर्ष अष्टे«लियामा हुने टि२० विश्वकप खेल्न पाउने छन् ।