एजेन्सी – दक्षिण अफ्रिकाविरुद्धको दोस्रो टेष्टमा पनि घरेलु टोली भारतले बलियो पकड बनाएको छ । कप्तान विराट कोहलीको दोहारो शतकका साथ ५ विकेटको क्षतिमा ६ सय १ रन बनाउँदै भारतले पहिलो इनिङ्स समाप्तीको घोषणा गरेको थियो ।

जवाफमा दोस्रो दिन शुक्रबार ब्याटिङ सुरु गरेको भ्रमणकारी टोलीको सुरुवात कमजोर भएको छ । दिनको खेल सकिदा दक्षिण अफ्रिकाले ३ विकेटको क्षेतिमा ३६ रन जोडेको छ । टोली भारत भन्दा ५ सय ६५ रनले पछाडि छ ।थिउनिस डी ब्रुइने २० र इन्रिच नोर्टेजे २ रनमा अविजित छन् । डेन इल्गार ६, टेम्बा बाभुमा ८ रनमा आउट भए भने एडिन मार्करामले खाता खोल्न सकेनन् ।

त्यसअघि कप्तान कोहलीले टेष्ट क्रिकेटमा उच्च स्कोर बनाएपछि भारतले इनिङ्स समाप्तीको घोषणा गरेको थियो । कोहलीले अविजित २ सय ५४ रन जोडे । ३ विकेटको क्षेतिमा २ सय ७३ रनबाट भारतले दोस्रो दिनको खेल अघि बढाएको थियो । केशव महराजको बलमा चौका प्रहार गर्दै कोहलीले २ सय ५० रन पुरा गरेका थिए ।

टेष्ट क्रिकेटमा कोहलीको अहिले सम्मकै उच्च स्कोर हो । टेष्ट क्रिकेटमा यो उनको सातौं दोहोरो शतक हो । टेष्ट क्रिकेटमा कोहलीको त्यो २६ औं शतक हो । यहि टेष्टबाट कोहलीले ७ हजार रन पुरा गरेका छन् । कोहली र शतक बनाउन ९ रनले चुकेका रविन्द्र जडेजाले छैटौं विकेटका लागि २ सय २५ रनको महत्वपूर्ण साझेदारी गरेका थिए ।

त्यसअघि अजिन्के रहाणे र कोहलीले पाँचौं विकेटका लागि १ सय ७८ रनको साझेदारी गरे । पहिलो दिन ओपन मंयक अग्रवालले शतक र चेतेश्वर पुजाराले अर्धशतक बनाएका थिए । तीन टेष्टको सिरिजको पहिलो खेलमा भारत २ सय ३ रनले विजयी भएको थियो ।