एजेन्सी – युवा ब्याट्सम्यान बाबर आजमको शतक र उस्मान शिनवारीको पाँच विकेटमा श्रीलंकासँगको दोस्रो वान डे खेलमा घरेलु टोली पाकिस्तान विजयी भएको छ ।

सोमबार राती सम्पन्न खेलमा पाकिस्तानले श्रीलंकालाई ६७ रनले पराजित गरेको हो । ३ सय ६ रनको लक्ष्य पछ्याएको श्रीलंका ४६.५ ओभरमा अल आउट हुँदै २ सय ३८ रनमा समेटियो ।

श्रीलंकाका लागि शेहान जयसूर्याले १ सय ९ बलमा ७ चौका र १ छक्का सहित ९६ रनको योगदान दिएपनि टोलीको हार टार्न सकेनन् । ४१ ओभरको पाँचौ बलमा उस्मान शिनवारीले कप्तान शरफराज अहमदबाट क्याच आउट गराएपछि करिअरको पहिलो शतक बनाउन चार रनले चुकेका थिए । दासुन शनाकाले ८० बलमा ६ चौका र २ छक्का सहित ६८ रन जोडे ।

एक समय १०.१ ओभरमा २८-५ को कमजोर अवस्थामा पुगेको श्रीलंकालाई जयसूर्या र शनाकाले ४०.५ ओभरसम्म १ सय ७७ रनको उत्कृष्ट शतकीय साझेदारी गर्दै लज्जास्पद फराकिलो हारबाट बचाएका थिए । वानिन्दु हसरंगा ३० रन जोड्न बाहेक अन्यले राम्रो प्रर्दशन गर्न सकेनन् । ७ ब्याट्सम्यानले दोहोरो अंकमा रन छुन सकेनन् । पाकिस्तानका लागि उस्मान शिनवारीले १० ओभरमा १ मेडन सहित ५१ रन खर्चेर ५ विकेट लिदै म्यान अफ द म्याच चुनिए । सादब खान २,इमाद वासिम,वहाब रियाज र मोहम्मद आमिरको नाममा समान १ विकेट रह्यो ।

त्यस अघि नेशनल स्टेडियम कराँचीमा टस जितेर पहिला ब्याटिङ गर्ने निर्णय लिएको पाकिस्तानले निर्धारित ५० ओभरमा ७ विकेटको क्षतिमा ३ सय ५ रन बनाएको थियो । पाकिस्तानका युवा ब्याट्सम्यान बाबर आजमले १ सय १५ रनको शतकीय योगदान दिए । बाबरले १ सय ५ बलमा ८ चौका र ४ छक्का प्रहार गरे । ओडीआई क्रिकेट करिअरमा बाबरको यो ११ औं शतक पर्दछ ।

ओपनर फखर जमानले ६५ बलमा ६ चौका र १ छक्का सहित ५४, इमाम उल हक ३१,हरिस सोहेल ४०,इमाद वासिम १२ र कप्तान शरफराज अहमद ८ रनमा आउट भए । तल्लोक्रममा इफ्तिखार अहमद २० बलमा समान २ चौका र छक्का सहित ३२ रनमा नट आउट रहे । श्रीलंकाका वानिन्दु हसरंगाले २ विकेट लिदा लाहिरु कुमारा र इसुरु उडनाको नाममा १-१ विकेट रह्यो ।

योसँगै तीन ओडीआई सिरिजमा पाकिस्तानले १-० को अग्रता लिएको छ । पहिलो खेल भारी वर्षाको कारण रद्ध भएको थियो । तेस्रो तथा अन्तिम खेल बुधबार हुुने छ ।