काठमाडौं (हाम्रो खेलकुद) – कप्तान पारस खड्काको ऐतिहासिक शतकमा नेपालले त्रिकोणात्मक सिरिजमा सिंगापुरलाई ९ विकेटले पराजित गरेको छ । १ सय ५२ रनको लक्ष्य नेपालले १६ ओभरमा १ विकेट गुमाउँदै पुरा गर्यो ।

नेपालको जितमा कप्तान पारस खड्का ५२ बलमा ७ चौका र ९ छक्का सहित १ सय ६ रनमा अविजित रहे । त्यस अघि टस जितेर पहिला ब्याटिङ थालेको सिंगापुरले २० ओभरमा ३ विकेट गुमाउँदै १ सय ५१ रन बनाएको थियो । पारसको ऐतिहासिक शतकसँगै एकै खेलमा नेपालले थुप्रै कीर्तिमान बनाएको छ ।

६. उच्च लक्ष्य पूरा

नेपालले टि२० आईमा सिंगापुरलाई हराउँन १ सय ५२ रनको लक्ष्य पुरा गर्यो । जुन टि२० आईमा नेपालले पुरा गरेको उच्च लक्ष्यमा पर्दछ । यस अघि नेपालले गत महिना सिंगापुरमा सम्पन्न आईसीसी टि२० एसिया विश्वकप छनोटमा कुवेतले प्रस्तुत गरेको १ सय ४२ रनको लक्ष्य पुरा गरेको थियो । जुन नेपालले टि२० आईमा पुरा गरेको उच्च लक्ष्य थियो ।

५. सर्वाधिक ठूलो जित

नेपालले १ सय ५२ रनको लक्ष्य पुरा गर्न मात्र १ विकेट गुमाउँदै पुरा गर्यो । अर्थात ९ विकेटको जित हात पार्यो । जुन टि२० आईमा नेपालले हात पारेको विकेटका हिसाबले सर्वाधिक ठूलो जित हो । यस अघि सर्वाधिक ठूलो जित गत महिना आईसिसि एसिया टि२० विश्वकप छनोटमा कुवेतमाथि ७ विकेट रहेको थियो ।

४. सर्वाधिक छक्का

कप्तान पारस खड्काले शतकीय इनिङ खेल्न ९ छक्का प्रहार गरे । टि२० आईमा नेपालको तर्फबाट एकै खेलमा कुनै पनि ब्याट्सम्यानले प्रहार गरेको यो सर्वाधिक छक्का समेत हो । यस अघि पारस र विनोद भण्डारीले मलेसियाविरुद्ध समान ५–५ छक्का प्रहार गरेका थिए

३. पहिलो पटक शतकीय र उच्च साझेदारी

तेस्रो विकेटका लागि कप्तान पारस खड्का र आरिफ शेखले १ सय ४५ रनको अविजित शतकीय साझेदारी गरे । टि२० मा नेपालको पहिलो शतकीय साझेदारी हो । यस अघि टि२० आईमा नेपालले सन् २०१४ मा बंगलादेशविरुद्ध पारस र शरद भेषवाकरले चौथो विकेटका लागि गरेको ८५ रनको साझेदारी उच्च रहँदै आएको थियो ।

२. टि२० मा पहिलो शतक

कप्तान पारस खड्का नेपालबाट टि२० इतिहासमा शतक प्रहार गर्ने पहिलो ब्याट्सम्यान बनेका छन् । यस अघि पारसले गत जुलाईमा मलेसियाविरुद्ध ८६ रनमा अविजित रहँदै टि२० आईमा नेपालको तर्फबाट एकै खेलमा उच्च रन बनाउने खेलाडी बनेका थिए । टि२० मा भने महबुब आलमले सन् २०११ मा साउदी अरेयिबासँग ८८ रन बनाएका थिए । जुन उच्च थियो ।

१. ओडीआईमा र टि२० दुवैमा शतक

कप्तान पारस खड्काले अर्को दुर्भल कीर्तिमान रचेका छन् । टि२० आईमा र अन्तर्राष्ट्रिय एकदिवसिय (ओडीआई) मा नेपालबाट शतक प्रहार गर्ने पहिलो र एक्लो खेलाडी बनेका छन् । दुवै फर्म्याटमा शतक प्रहार गर्ने पारस नेपालबाट एक्लो र पहिलो ब्याट्सम्यान हुन् । पारस बाहेक अन्य कुनै पनि नेपाली खेलाडीले टि२० र ओडीआई शतक प्रहार गर्न सकेका छैनन् ।