एजेन्सी – क्वारेवियन प्रिमियर लिग (सीपीएल) मा आज नेपाली लेग स्पिनर सन्दीप लामिछानेको टोली बार्बाडोस ट्राईडेन्टसले जमैका तल्लावाह्ससँग खेल्दै छ । खेल नेपाली समय अनुसार आज राती १०:४५ पछि सुरु हुने छ । जमैकामा विश्फोटक ब्याट्सम्यान क्रिस गेल छन् ।

सुरुवाती चारै खेलमा पराजित भएको जमैका पहिलो जितको खोजिमा छ । यता सन्दीप सम्मिलित बार्बाडोसले २ मध्य समान १ मा जित र हारका बेहोरेको छ । पहिलो जित निकाल्ने क्रममा बार्बाडोसले सेन्ट किट्स एण्ड नेभिस प्याट्रियटसलाई १८ रनले पराजित गरेको थियो ।

जमैकाका लागि क्रिस गेल मुख्य हतियार हुन् । उनले सेन्ट किट्सविरुद्ध ६२ बलमा १० छक्का र ७ चौका सहित १ सय १६ रनको विश्फोटक इनिङ खेलेपनि जमैका पराजित भएको थियो । विश्फोटक गेल बार्बाडोसका लागि घातक बन्न सक्छन् । त्यस्तै अर्का विश्फोटक आन्द्रे रसेल भने घाइते छन् । सेन्ट लुसियाविरुद्ध हार्डस भिलोजेनको बलले लागेर आन्द्रे रसेल घाइते भएका थिए । त्यसैले रसेल आजको खेलमा खेल्ने वा नखेल्ने अनिश्चित छ ।

पहिलो खेलमा गुयानाविरुद्ध कमजोर ब्याटिङ गरेको बार्बाडोसले दोस्रो खेलमा सेन्ट किट्सविरुद्ध २ विकेट गुमाउँदै १ सय ८६ रन बनाएको थियो ।

आजको खेलमा सन्दीप प्लेइङ ११ मा पर्ने निश्चित जस्तै छ । अघिल्लो खेलमा सेन्ट किट्सविरुद्ध ४ ओभरमा २२ रन खर्चेर ३ विकेट लिदै म्यान अफ द म्यान बनेका सन्दीपको स्थान पक्का देखिन्छ । सन्दीपले पहिलो खेलमा गुयानाविरुद्ध १ ओभर मात्रै बलिङ गर्ने मौका पाएका थिए ।