एजेन्सी – भारतीय क्रिकेट बोर्ड (बीसीसीआई) ले घरेलु मैदानमा दक्षिण अफ्रिकासँग हुने तीन टेष्टको लागि युवा ब्याट्सम्यान शुभमन गिललाई मौका दिएको छ। विहीबार घोषणा १५ सदस्य टोलीमा गिल अटाएका छन् । गिलले भारतीय वान डेमा भने डेब्यू गरिसकेका छन् ।

१५ सदस्य घोषणा टोलीमा पछिल्लो समय टेष्टमा निकै खराब लयमा रहेका केएल राहुल बाहिरिएका छन् । त्यस्तै भारतले सिमित ओभरमा वर्तमान क्रिकेटमा नम्बर वान ओपनरको छवि बनाएका रोहित शर्मालाई पनि मौका दिएको छ । हार्दिक पान्ड्या भने टोली बाहिर छन् ।

सन् २०१८ मा भारतलाई यू१९ विश्वकप जिताउन गिलको प्रर्दशन महत्वपूर्ण थियो । त्यस्तै गिलले घरेलु क्रिकेट पनि निरन्तर उत्कृष्ट प्रर्दशन गर्दै आएका छन् । कोलकता नाइट राइडर्सबाट आईपीएल खेलेका गिल नेपाली लेग स्पिनर सन्दीप लामिछाने सहित थुप्रैलाई पछि पार्दै गत संस्करणमा इमर्जिङ प्लेयर घोषित भएका थिए ।

भारत र दक्षिण अफ्रिकाबीच समान ३ टेष्ट र टि२० सिरिज हुने छ । पहिलो टि२० खेल १५ सेप्टेम्बरमा हुने छ । त्यस्तै १८ मा दोस्रो र तेस्रो तथा अन्तिम २२ सेप्टेम्बरमा हुने छ । टेष्ट भने २ अक्टोबर देखी सुरु हुने छ ।

भारतीय टेष्ट टोली :

विराट कोहली (कप्तान), मयंक अग्रवाल, रोहित शर्मा,चेतेश्वर पुजारा,अजिंक्या रहाणे(उपकप्तान),हनुमा विहारी,शुभमन गिल,ऋषभ पन्त(विकेटकीपर), रिद्धीमान शाह(विकेटकीपर),रविचन्द्र आश्विन,रविन्द्र जडेजा,कुलदीप यादव,मोहम्मद शामी,जसप्रित बुमराह र इशान्त शर्मा ।