यूएईमाथि नेपाली बलर पूर्णरुपमा हाबी

काठमाडौं (हाम्रो खेलकुद) – श्रीलंकामा जारी एसीसी यू१९ एसिया कप क्रिकेट प्रतियोगितामा समुह बी को अन्तिम खेलमा नेपाल र यूएईबीच प्रतिस्पर्धा जारी छ ।

नेपालले प्रस्तुत गरेको २ सय ८६ रनको विजयी लक्ष्य पछ्याएको यूएईले कमजोर प्रर्दशन गरिरहेको छ । स्पिनर सागर ढकालले घातक बलिङ गर्दा नेपाल यूएईमाथि पूर्ण रुपमा हाबी बनि रहेको छ । यूएईले २५ ओभरमा १ सय रन जोड्न ५ विकेट गुमाएको छ । उसका लागि मोहम्मद फ्रर्जुदिन २ र ओसन हसन ९ रनमा क्रिजमा छन् ।

नेपालले नवौं ओभरको पाँचौ बलमा पहिलो सफलता हात पारेको थियो । कमल सिंह ऐरीले आशिफ शेखबाट निल रोहन लोबोलाई ५ रनमा क्याच आउट गराए । १३ ओभरको अन्तिम बलमा अर्का ओपनर सैइद हैदरलाई सागर ढकालले १५ रनमा एलबी डब्लू आउट गरे । सागरलनै १८ ओभरको चौथो बलमा अरबिन्द्र रुद्रबेललाई २८ रनमा बोल्ड आउट गरे । उनले ३४ बलमा ४ चौका र १ छक्का प्रहार गरे ।

सागरले नै २० औं ओभरको पाँचौ बलमा अनिसलाई १२ रनमा एलबी डब्लूको घरापमा पारेपछि नेपाल हाबी बनेको हो । पवन सरार्फले अल्सान शरफुललाई २१ रनमा क्याच आउट गराएका छन् । सागरले ५ ओभरमा २ मेडन सहित १३ रन खर्चेर ३ विकेट लिई सकेका छन् । कमल सिंह ऐरी र पवन सरार्फको नाममा समान १ विकेट छ ।