काठमाडौं(हाम्रो खेलकुद) – वुमन्स च्याम्पियन्स लिग (डब्लूसीएल) टि-२० क्रिकेट प्रतियोगिता आगामी असोज अन्तिम सातामा हुने भएको छ।

आयोजक क्विन्स इभेन्ट्स म्यानजमेन्ट प्रा.लि.ले सोमबार एक प्रेस विज्ञप्ती जारी असोज २९ देखी कात्तिक ७ सम्म कीर्तिपुरस्थित त्रिवि मैदानमा हुने जनाएको छ । यो डब्लूसीएलको तेस्रो नयाँ मिती हो । यस अघि दुई पटक घोषणा भएको डब्लूसिएल समयमै हुन सकेन ।

जेठ ३ देखि ११ गते सम्म हुने भने पनि विभिन्न कारण उक्त समयमा हुन सकेको थिएन । उक्त समयमा हुन नसकेपछि पुन प्रेस विज्ञप्ती जारी गर्दै डब्लुसिएल असोज ३ गतेदेखि ११ गते सम्म कीर्तिपुरस्थित त्रिवि मैदानमा हुने बताईएको थियो ।

डब्लूसीएलमा ५ शहरका टोलीबीच प्रतिस्पर्धा हुने छ । ललितपुर फाल्कोन्स,पोखरा पल्टन,क्यापिटल्स रोयल्स काठमाडौं,चितवन राइनोज र विराटनगर टाइन्टस गरि ५ ले प्रतिस्पर्धा गर्नेछन् । गत बैशाखमा काठमाडौंमा भएको ड्राफ्टबाट ५५ खेलाडीलाई ५ टोलीले अनुबन्ध गरेका थिए। नेपालमै पहिलो पटक भएको ड्राफ्टमा कुल १ सय ९ जना खेलाडीले आफ्नो नाम दर्ता गराएका थिए ।

राष्ट्रिय महिला टोलीकी सदस्य एवंम् पूर्व कप्तान नेरी थापा ललितपुरकी मार्की खेलाडी हुन् । त्यस्तै पोखरामा सिता रानामगर,काठमाडौंमा राष्ट्रिय टोलीकी कप्तान रुविना क्षेत्री,चितवनमा इन्दु बर्मा र विराटनगरमा सरिता मगर मार्की खेलाडी रहेका छन् ।